Qurbanov zəflikdən danışdı

Unibank Premyer Liqasının XXIII turunda "Bakı" Ağdamın "Qarabağ" klubuna 2:0 hesabı ilə qalib gəldi, "Simurq" Zaqatalada "Karvan" komandası ilə 0:0 oynadı, "Standard" isə "Olimpik-Şüvəlan"a 2:1 hesabı ilə qalib gəldi. Azerisport.az məşqçilərin fikirləri ilə sizi tanış edir:

 

Məqsəd Yaqubəliyev, "Bakı" klubunun məşqçisi: "Qarabağ" çox güclü komandadır. Bugünkü oyunda qalib gəldiyimiz üçün şadıq. "Qarabağ" "ilk altılıq"da cəmi bir dəfə məğlub olmuşdu. Baş məşqçimiz bu oyunda cəzalı idi. Güclü küləyin olması daha yaxşı oyun göstərməyimizə mane oldu. Buna baxmayaraq, "altılığa" qələbə ilə başladıq. Xüsusən də oyunun ikinci hissəsində gözəl oyun nümayiş etdirib iki qol vurduq".

 

Qurban Qurbanov, "Qarabağ" klubunun baş məşqçisi: "Oyun çox maraqlı keçdi. "Bakı" klubunu qələbə münasibəti ilə təbrik edirəm. Belə oyunlar çempinonata gözəllik verir. Komandamız bu oyunu zəif oynadı. Futbolçulardan narazı qalmadım, qarşıda bizi "Xəzər Lənkəran"la çətin səfər oyunu gözləyir".

 

Roman Pokora, "Simurq" klubunun baş məşqçisi: "Oyun haqqında çox danışmaq istəməzdim. İlk hissədə "Karvan" daha üstün oynadı. Bizim komandamız nisbətən təzədir, buna baxmayaraq futbolçulardan razı qaldım. Bu bərabərlik qarşıdakı oyunlarda daha yaxşı nətcələr qazanmağa ümid verir. "Karvan" turnir cədvəlində aşağı pillələrdə olsa da, çox güclüdür. Fikrimcə, nəticə oyuna görə oldu".

 

Yunis Hüseynov, "Karvan" klubunun baş məşqçisi: "Bu oyunda qələbə bizə çox lazım idi. Əfsuslar olsun ki, qol vura bilmədik, qələbə qazana bilmədik. "Simurq" çempionatımızın ən yaxşı komandalarındandır. İkinci hissənin ilk 15 dəqiqəsini yaxşı oynadıq. Lakin komandanın ümumilikdə göstərdiyi oyundan narazı qaldım".

 

Nazim Süleymanov, "Olimpik-Şüvəlan" klubunun baş məşqçisi: "Qələbə münasibəti ilə "Standard" komandasını təbrik edirəm. Bugünkü oyun göstərdi ki, komandamız həm birinci, həm də ikinci hissədə bir sıra qol imkanları əldə etsə də, bunlardan istifadə edə bilmədi. Verdiyimiz tapşırıqları sona kimi yerinə yetirə bilmədilər. Elə bil komandada özünəinam yox idi. "Standard" son zamanlar çox gözəl oyun göstərir. Kubok oyununda onlara uğurlar arzulayıram".

 

Böyükağa Hacıyev, "Standard" klubunun baş məşqçisi: "Bu gün meydanda bir-birinə layiq iki komanda mübarizə apardı. İlk hissədə istədiyimiz oyunu göstərə bilmədik, lakin ikinci hissədə vurduğumuz qollarla qalib gəldik. Bu qələbə bizə autsayderlər sırasından qurtulmağa çox kömək edəcək. Qarşıda çətin kubok oyunumuz var, ona hazırlaşacağıq. "Olimpik-Şüvəlan" klubuna uğurlar arzulayıram".

 

PFL