UEFA-nın meneceri Azərbaycan qızları haqqında (FOTO)
Bakıda səfərdə olan UEFA-nın Kütləvi Futbol Proqramı üzrə meneceri Robin Rassel AFFA-nın rəsmi saytına müsahibə verib. Azerisport.az xəbər verir ki, Rassel futbolun kütləviliyindən tutmuş qadına futboluna qədər bir çox məsələlərdən danışıb: “Azərbaycanda ilk dəfə 2 il bundan əvvəl olmuşam. Ötən 2 il ərzində görülən işlər məni müsbət mənada təəccübləndirdi. Futbolun kütləviliyinin, təhsilin, infrastrukturun inkişafı üçün çox böyük işlər görülüb. Orta məktəblərdə tədris olunan futbol dərsini, məktəblilər arasında təşkil olunmuş turniri izlədim. Gördüklərim məni heyran etdi.
Məktəbli qızların futbolla maraqlanmasını, qızlar arasında bu idman növünə həvəs yaranmasını xüsusilə qeyd etmək istərdim. Bu, yalnız qızlar arasında deyil, həm də bütövlükdə futbolun inkişafı üçün vacibdir. Çünki bu gün futbol oynayan 10-12 yaşlı qızlar gələcəkdə futbolçu olmasalar da, futbola bağlı qalacaqlar, futboldan uzaqlaşmayacaqlar. Bu, onların sağlam yaşamaları üçün də vacibdir. Bütün bu görülən işlər ümumilikdə futbolun inkişafı deməkdir. Heç də hər ölkə dünya və Avropa çempionatının seçmə mərhələsindən uğurla keçə bilmir. Ancaq irəliyə - gələcəyə baxmaq, milli komandanın uğurları üçün kütləvi futbolu inkişaf etdirmək çox vacibdir. Mən bu gün ölkənizdə futbolun kütləviliyi naminə böyük işlərin görüldüyünü müşahidə etdim. Təbii ki, bütün bu işlər AFFA-da işlərin düzgün qurulduğunun göstəricisidir. AFFA bu sahədə düzgün yol tutub”.
