13 mart 2010 17:55
Neftçi məğlubiyyətdən qaçdı (YENİLƏNDİ)
Bu gün daha iki oyunla “Unibank” Premyer Liqasının Final mərhələsinin ilk turuna – 23-cü tura yekun vurulur. Azerisport.az xəbər verir ki, bir neçə gün əvvəl ölkə kubokunun 1/4 final mərhələsində “İnter”ə öz meydançasında 0:3 hesabı ilə məğlub olan “Neftçi” indi bu komandadan revanş almaq üçün yaxşı imkan qazanıb. Tovuzda keçirilən digər matçda isə “Turan” “Muğan”ı qəbul edir.
“Turan” – “Muğan” 1:2
Tovuzda keçirilən qarşılaşmada ilk hissədən sonra hesab açılmayıb. İkinci hissədə sonra hücumlarını kəsərini artıran salyanlılar 52-ci dəqiqədə hesabı açıblar: Fərrux İsmayılovun ötürməsini Vüsal Hüseynov dəqiq tamamlayıb. 60-cı dəqiqədə Ekrem Hodziçin qırmızı vərəqə almasına rəğmən, "Muğan" azlıqda ikinci topu da vurub. İlk qolun ötürməsinin müəllifi Fərrux İsmayılov bu dəfə özü "Turan"ı məyus edib. 80-ci dəqiqədə meydan sahibləri vəziyyəti bir qədər düzəltməyə müvəffəq olublar. Lakin kapitan Nadir Nəbiyevin qolu tovuzlu azarkeşləri ümidləndirsə də, "Turan"ın xal itkisinə mane olmayıb. Bu qələbə ilə "Muğan" turnir cədvəlində vəziyyətini bir qədər yaxşılaşdıraraq, "Standard"ı geridə qoyub.
“İnter” – “Neftçi” 1:1
Turun ən maraqla gözlənilən qarşılaşmalarından biri start götürüb. "Neftçi" üç gün əvvəlki biabırçılığın əvəzini çıxa biləcəkmi?
Birinci hissə boyu üstünlük qonaqların tərəfində olsa da, "İnter"in minimal qol şansından maksimum istifadə etmək bacarığı bu dəfə də özünü göstərdi. Branislav Çervenka cinah ötürməsini dəqiq tamamladı. 1:0. Deyəsən, "Neftçi"nin qisas planları təxirə salınır.
Qonaqlar "İnter" sindromuna son qoymaq üçün irəli atılıblar. "Neftçi" pis oynamır, hətta təhlükəli vəziyyətlər də yaradır. Amma məğlubiyyət qaçmaq üçün, nə qədər sadə səslənsə də, qol lazımdır.
Nəhayət, "ağ-qaralar"ın hücumları bəhrı verdi. 76-cı dəqiqədə təyin olunan penaltini "Neftçi"nin və premyer liqanın bombardiri Adrian Nyaqa dəqiq yerinə yetirdi - 1:1. Bu qol hər iki komandanı sakitləşdirdi. Son dəqiqələrdə Çervenka dubl etməyə yaxın olsa da, onun zərbəsi dəqiq alınmadı və matç bərabərliklə bitdi.
Turnir vəziyyəti
İlk altılıq: XL, "İnter" - 18 xal, Bakı, Qarabağ - 15 , Neftçi - 12, Qəbələ - 7.
İkinci altılıq: Simurq - 22, OŞ - 18, Turan - 16, Muğan - 13, SS - 12, Karvan - 6.
