Yarımfinalın cütlükləri: Bakı - İnter, XL - OŞ (YENİLƏNDİ)
Bu gün Azərbaycan kubokunda daha iki yarımfinalçı məlum olacaq. Azerisport.az xəbər verir ki, Bakıda İnter Neftçini, Xəzər Lənkəran isə öz meydançasında Qarabağı qəbul edir.
Möhtəşəm matçın 16-cı dəqiqəsində Xəzər Lənkəran hesabı açıb. Kristian Kabral fərqlənib - 1:0. Bu hesab lənkəranlıları tamamilə qane edir. İlk hissədə bərabər səviyyəli mübarizə getsə də, lənkəranlılar qələbə hesabını hələ qoruyub saxlaya bilirlər.
Lənkəranda ikinci hissə başladı. Meydan sahiblərinin mərhələ adlaması üçün bu hesabı daha 45 dəqiqə saxlaması kifayətdir.
65-ci dəqiqədə rəqibə qarşı kobudluğa görə ikinci sarı vərəqəni görən Elnur Allahverdiyev komandasını azlıqda qalıb. Qarabağın oyunu dəyişdirmək şansları bir qədər də azaldır.
Matçın başa çatmağına bir neçə dəqiqə qalmış Qarabağın heyətində daha bir futbolçu meydançadan qovuldu. Amma bu epizodda FİFA referisi Vüsal Əliyev kobud səhvə yol verdi. O, Rəşad Sadiqova ikinci sarı vərəqəni göstərdi. Amma maraqlıdır ki, Sadiqovun... sarı vərəqəsi yox idi!
Xəzər Lənkəran qələbə hesabını elə bir çətinlik çəkmədən qorudu və yarımfinalda Olimpik-Şüvəlana rəqib oldu.
