Maraqsız maraqlı olanda...
“Unibank” Premyer Liqasının 24-cü turu yarılandı. İkinci “altılıq” nümayəndələri bu gün Final mərhələsi çərçivəsində ikinci oyunlarına çıxdılar.
Azerisport.az xəbər verir ki, bu mini-turnir çoxları üçün maraqlı olmasa da, maraqlı məqamlardan xali deyil. Məsələn, kim bir neçə ay əvvəl ardıcıl qələbələrlə az qala çempionluğu hədəfləyən Simurqun bu gün evdə 0:3 hesabı ilə məğlub ola biləcəyini düşünərdi? Heç kim. Bu komanda ən iddiasız vaxtlarında belə evdə 3 top buraxmayıb, özü də Olimpikdən. Şüvəlanlılar son iki mövsüm ərzində - ilyarım sonra ilk dəfə (!) Simurqun qapısına yol tapdılar və bunda qonaqların gözəl oyunundan çox “sarı-qaralar”ın ruh yüksəkliyinin olmaması rol oynadı. Elə Roman Pokora da matçdan sonra bunu dedi. Lakin bu həvəssizlik nə qədər davam edəcək və komandanı hara aparacaq?
Sumqayıtda isə triller yaşandı. Əsl Hollivud filmlərinə xas süjet. Əslində, baş qəhrəman olan Turan 90 dəqiqə bunu büruzə vermədi, iki dəfə hesabda geri düşdü. Lakin gəldi, 90-cı dəqiqədə fərqləndi və Tovuza çox vacib 3 xalla qayıtdı. Turan uzun illərdir ki, iddialı deyil. Bununla belə, lazım gələndə xarakter nümayiş etdirmək həmişə bu kollektivə xas keyfiyyət. Bu keyfiyyətin növbəti qurbanı kim olacaq?
İndi isə Yevlaxa yollanırıq. Digər tərəfdən, ora yollanmağın elə bir mənası yoxdur. “Boz” kollektivlər – Karvan və Muğan 90 dəqiqə nə qədər çalışsalar da, rəqib qapısının qıfılını qıra bilmədilər. Şahidlər deyir ki, yevlaxlılar qələbəyə daha yaxın olub. Amma nə fayda? Hətta 90 istifadə olunmayan real qol vəziyyəti bir qola bərabər ola bilməz. Muğan isə səfərdən 1 xal dönməyi öz aktivinə yaza bilər. Görəsən, bu xallar axırda onlara kömək edəcəkmi?
