Xaricdəki azərbaycanlıların ümumi qiyməti - 27 milyon dollar!

İndi Azərbaycandan kənarda 9 soydaşımız çıxış edir. Azerisport.az onların transfer qiymətlərini öyrənib.

Təəccüblənməyin, bu, səhv deyil; həqiqətən də əcnəbi klubların şərəfini 9 azərbaycanlı futbolçu qoruyur. Sadəcə, onlardan yalnız 7-si Azərbaycan yığmasının formasını geymək hüququna malikdir. Digər ikisi isə həmyerlimiz yox, soydaşımızdır; Aleksandr Əliyev (Lokomotiv Moskva) Rusiyada, Sərvət Çətin (Qalatasaray) isə Türkiyədə doğulub. Bunlardan Əliyev Ukrayna, Sərvət isə Türkiyə millisinin şərəfini qoruyur.

Lakin bütün bunlar onları azərbaycanlı saymamağımıza səbəb ola bilməz. Özü də, məsələn, Moskvada doğulub boya-başa çatan Aleksandr Səmədov (Dinamo Moskva) rusiyalı hesab olunsa da, hələ də onu Azərbaycan millisində görmək şanslarımız var. Futbolçu Rusiya yığmasının heyətində rəsmi görüşlərdə meydançaya çıxmayıb. Buna görə də hər şey AFFA-nın əlindədir…

Bəs digər 6 nəfər? Özünü sayın: Vaqif Cavadov (Tvente), Mahir Şükürov (Anji), Anatoli Ponomaryov (Orduspor), Vitali Kovalyov (Kartalspor), Branimir Subaşiç (Srvena Zvezda) və Emin Ağayev (Volqa Tver). İndi əmin oldunuzmu?

Ağlımıza balaca bir araşdırma aparmaq fikri gəldi. Öyrənmək istədik ki, görəsən, əncəbi klubların şərəfini qoruyan azərbaycanlı futbolçuların ümumi transfer qiyməti nə qədərdir? Bunun üçün Almaniyanın məşhur transfermakt.de saytının göstəricilərini əsas götürdük. Xatırladaq ki, futbolçuların transfer qiymətləri hesablanması zamanı ayrı-ayrı vaxtlarda açıqlanan məbləğlərdən əlavə, futbol agentlərinin verdiyi informasiya da nəzərə alınır.

Beləliklə, 9 azərbaycanlı futbolçunun ümumi transfer qiyməti 20 milyon avroya (27 milyon ABŞ dolları; 1 avro= 1,3473 dollar) bərabərdir! Əlbəttə, dünya futbolunda qiyməti bundan iki, üç dəfə artıq olan ayrı-ayrı futbolçular var. Amma razılaşın ki, bu heç də pis məbləğ deyil.

Təbii ki, ən bahalı futbolçular daha güclü klublarda çıxış edən “üçlük”dür. Siyahıya Sərvət başçılıq edir: 8,7 milyon avro. Əliyev ondan bir qədər az qiymətləndirilir – 6 milyon.

Yığmamızda çıxış etmək hüququ olan həmyerlilərimizdən trannsfer məbləği milyonu adlayan yeganə oyunçu Səmədovdur: 3,8 milyon avro. Subaşiç milyondan bir qədər az, 800 min avroya dəyərləndirilir.

Tam siyahı belədir (məbləğlər avro ilə göstərilib):