Yalnız Azərbaycanda, yaxud Texniki problemlər səbəbdirmi?

Azərbaycanda analoqu olmayan hadisə baş verib: futbol üzrə ölkə çempionatının bir nömrəli qarşıdurması canlı yayımlanmır! Azerisport.az bu faktı əsas götürərək, bir daha “Unibank” Premyer Liqasının yayım məsələlərinə və ümumiyyətlə, “İdman Azərbaycan”ın proqram siyasətinə toxunur.

Bu gün gündüz saatlarında “İdman Azərbaycan” telekanalı futzal üzrə 2010-cu il Avropa çempionatının finalının - İspaniya – Portuqaliya matçının videoyazısını azarkeşlərə təqdim etdi. Auditoriya hər zaman fərqli şeylər tələb edir, üstəlik, ictimai rəy də çox vaxt yanlış olur. Bunu jurnalistlər özləri də bilirlər. Bununla belə, mətbuat işini məhz bu istiqamətdə qurur. Jurnalistika ictimai rəy yaradır. Öz növbəsində, iş prinsiplərini müəyyənləşdirərkən, artıq formalaşdırılmış ictimai rəyi əsas götürür. Bax, belə bir qapalı dairə.

Amma biz inanmırıq ki, hansısa idman azarkeşi futzal üzrə AÇ-2010-un final matçına bir daha, videotəkrarda baxmaq istəsin. Yox, təbii, belə adamlar var, amma onların sayı rəyləri nəzərə alınmayacaq qədər kiçikdir. Bir də ki, Azərbaycanın iştirak etmədiyi, özü də çox populyar olmayan idman növündən oyun axı necə böyük auditoriyaya maraqlı ola bilər?

Bu yayımın səbəbləri sadədir: efir vaxtını doldurmaq lazımdır. Bunun üçün verilişlərə gərək var. “İdman Azərbaycan” isə, deyəsən, bu mənada tənbəllikdən əl çəkə bilmir. Kanalda idman efirinə xas müəllif verilişlərinin sayı sıfır həddindədir. Analitikaya isə, ümumiyyətlə, ras gəlmək mümkün deyil...

Lakin gəlin, bütün bunları kənara qoyaq. Bax, biz futbolun kütləviləşdirilməsindən və inkişafından danışırıq. Siz deyin: televiziyanın faəl iştirakı olmadan buna necə nail olmaq mümkündür? Cavab: heç cür. Bu gün isə televiziya, faktiki olaraq, nəzarətçi funksiyasını daşıyır.

Bu tur “Unibank” Premyer Liqasının cəmi bir oyunu – Bakı – Qəbələ matçı azarkeşlərə canlı yayımda təqdim olunacaq. Yumşaq desək, digər iki görüşlə - Qarabağ – İnter, Xəzər Lənkəran – Neftçi - müqayisədə heç də böyük auditoriya toplayacağı gözlənilməyən qarşılaşma. Bunun səbəbini kanalın direktoru Elsevər Dünyamalıyev azerisport.az-a açıqlayıb və siz asanca onun sözlərini saytımızdan tapa bilərsiniz. Amma problem bu deyil. Problem kanalın işinə hətta bütün bu texniki nasazlıqlar olmadan belə məsuliyyətsiz yanaşmasıdır.

“Yayım toru”nun anlaşılmaz şəkildə qurulması, reportajların müasir standartlardan çox-çox uzaq olması və digər keyfiyyət problemləri barədə artıq danışmışıq. Lakin Azərbaycanın futbol azarkeşi XL – Neftçi oyununu mütləq canlı yayımda izləmək istəyir. Və onu hər hansı texniki problemlər maraqlandırmır. O hətta televizoyun səsini alıb, şərhçiyə qulaq asmadan da matçı izləyə bilər. Bu onun seçimidir

Bu gün isə Azərbaycan azarkeşi ölkənin bir nömrəli oyununu izləmək imkanından məhrumdur. Futbolun kütləviləşdirilməsinə və inkişafına cavabdeh olan qurumlar yaxşı-yaxşı fikirləşsin...