Bu gün, saat 21.00. Qalatasaray – Fənərbaxça

Bu gün axşam saatlarında Türkiyənin və Azərbaycanın futbol azarkeşlərinin diqqəti İstanbulun “Əli Sami Yen” stadionuna yönələcək.

Azerisport.az xəbər verir ki, əfsanəvi arenada Türkiyə Superliqasının 27-ci turu çərçivəsindı keçiriləcək. Cümə günü lider Bursasporun səfərdə İstanbul BŞB klubuna gözlənilməz məğlubiyyəti (1:2) və dünən Beştiktaşın Əskişəhirspor üzərində çətin qələbəsindən (3:2) sonra turnir cədvəlinin yuraxılarında vəziyyət gərginləşib. Dörd komanda çempionluq şansını saxlayır və 1-ci yerlə 4-cü yer arasında indi cəmi 3 xallıq fərq var. Qalatasaray qələbə qazanacağı təqdirdə, xalını 56-ya yüksəldəcək və Bursasporu ötəcək. Fənərbaxça isə qalib gələcəyi halda, 55 xalla “yaşıl timsahlar”la liderliyi bölüşəcək. Heç-heçə yalnız Ərtoğrul Sağlamın komandasını qane edir.

Hər iki komandanın təxmini 11-liyi belədir:

Qalatasaray: Leo Franko – Səbri Sarıoğlu, Lukas Neyl, Sərvət Çətin, Hakan Balta – Kader Keyta, Barış Özbək, Mustafa Sarp, Arda Turan – Covanni dos Santos, Jo

Fənərbaxça: Volkan Dəmirəl – Gökhan Gönül, Bilika, Dieqo Luqano, Andre Santos – Mehmet Topuz, Səlçuk Şahin, Əmrə Belözoğlu, Vederson, Aleks – Daniel Quisa

Referi: Cüneyt Çakır