Neftçiyə minnətdar olanlar

Tura XL – Neftçi matçı təsadüf etdiyinə görə digər oyunlar bu görüşün kölgəsində qalsa da, məsələn, Qarabağ – İnter qarşıdurması az əhəmiyyət daşımadı.

Azerisport.az xəbər verir ki, Qurban Qurbanovun yetirmələri qocalmaq bilməyən Aslan Kərimovun qolu məğlubiyyətdən qaçdılar, bununla da ardıcıl 3 oyun davam edən məğlubiyyət seriyasına son qoydular. Amma bu, Qarabağın bütün problemlərinin geridə qalması anlamına gəlməməlidir. Komandanın fiziki durumu ürəkaçan deyil. Futbolçular artıq yorulub. Və İnterin Quzanlıdan qələbə ilə dönə bilməməsi yalnız öz səhvləri ilə əlaqədardır.

Hərçənd, Kaxaber Çxadadzenin yetirmələrinin oyununu da möhtəşəm alınmadı. İnterin bu tur çıxışı da böyük suallar doğurdu. Düzdür, səfərdə məğlub olmamaq həmişə yaxşı nəticə hesab olunur, amma Xəzər Lənkəranın İnterə çata bilməməsinə görə “bankirlər” yalnız Neftçiyə minnətdar olmalıdırlar.

İlk baxışdan turnir cədvəlinin yuxarılarında vəziyyət dəyişmədi. Lakin sabah Bakı Qəbələ üzərində qalibiyyətlə liderlərə yaxınlaşa bilər. Qonaqların qələbəsi isə vəziyyəti bir qədər də mürəkkəbləşdirəcək. Yenə də səfərdə məğlub olmayan Neftçinin sayəsində...

İkinci “altılıq”da Simurqun qələbəsiz seriyası davam edir. Cəmi 13-14 az-çox təcrübəli futbolçu ilə qalan Roman Pokora, görünür, yetirmələri üçün lazımi sözlər tapa bilmir. İki ay əvvəl Simurqun Tovuzdan qolsuz bərabərliklə dönməsi bəlkə də klub üçün faciə sayılardı. Amma indi bu nəticə normal qarşılanır. Sabah hətta Olimpik-Şüvəlan Karvanı məğlub edərək, zaqatalalıları 7-ci pillədən sıxışdırsa belə, bu qorxulu görünməyəcək. 7 və ya 8-ci yer, nə fərqi var?

Bu gün həmçinin Muğanın Standard üzərində vacib qələbə qazandığı və təhlükəli zonadan bir qədər uzaqlaşdığını qeyd etmək olar. Standard isə, deyəsən, ümidini çoxdan itirmiş Karvana yoldaş olmaq “əzmindədir”. Hər halda, xilasedici 10-cu pillə ilə xal fərqi artıq 5-ə bərabər olub...

"Unibank" Premyer Liqası, 25-ci tur

Qarabağ – İnter 1:1

Muğan – Standard 1:0

Turan – Simurq 0:0

XL – Neftçi 0:0

Turnir vəziyyəti

Birinci "altılıq":İnter - 22 xal (13 oyun), XL - 19 (13), Qarabağ, Neftçi  - 16 (13), Bakı - 15 (12), Qəbələ - 10 (12)

İkinci "altılıq":  Simurq - 23 (13), OŞ - 21 (12), Turan, Muğan - 17 (13), Standard - 12 (13), Karvan - 8 (12)