Müharibə və sülh
Unibank Premyer Liqasında 25-ci tura yekun vuruldu. Vəziyyət belə gətirdi ki, hətta 3 oyunun nəticəsi belə ilk “altılıq”dakı vəziyyəti dəyişmədi.
Azerisport.az xəbər verir ki, bunun əsas səbəbi hər üç qarşılaşmanın heç-heçə başa çatması oldu. Xəzər Lənkəranın Neftçi, İnterin isə Qarabağla görüşlərində xal itirməsindən sonra Bakı paytaxtda Qəbələ qarşısında büdrədi. Və bu böyük gözlənilməzlik olmadı.
Bülənt Qorxmazın gedişindən sonra paytaxtlıların özünəinamının artacağını gözləmək sadəlövhlük olardı. Bu isə, nə qədər qəribə səslənsə də, cari çempionun ən zəif nöqtəsidir. Komanda öz gücünə tam arxayın deyil. Bu səbəbdəndir ki, Bakı bir oyunda fantastik futbol sərgiləyə, digər görüşdə isə durduğu yerdə xal itirə bilər.
Qəbələ ilə qarşılaşmada da “zolaqlılar” uzun müddət hesabda öndə oldular. Amma bu qonaqlara ciddi təsir göstərmədi və öz oyun üslubundan sona qədər çəkilməyən Qəbələ məğlubiyyətdən xilas olmağı bacardı. Hərçənd, matçdan sonra Ramiz Məmmədov iki xal itirdiklərini və bu heç-heçədən təəssüfləndiklərini gizlətmədi.
Deyəsən, Qəbələ hələ çoxlarının “qanının arasına girəcək”. Hər halda, komandanın Simurqun ötənilki uğurunu təkrarkayıb avrokuboklara vəsiqə qazanması o qədər də qeyri-real görünmür.
“Ekvatordan cənubda” – ikinci “altılıq”da isə vəziyyət bir qədər aydınlaşıb. Premyer Liqanı tərk etməyə ən real namizəd olan Karvana Standardın yoldaş olacağı daha inandırıcı görünür. Hər halda, Simurq və OŞ bir qədər rahat nəfəs ala bilər. Turanla Muğan isə təhlükəli 11-ci pillədən 5 xal aralana biliblər.
Premyer Liqa, 25-ci tur
Turnir vəziyyəti:
Birinci "altılıq": İnter - 22 xal, XL - 19, Qarabağ, Neftçi, Bakı - 16, Qəbələ - 11.
İkinci "altılıq": Simurq - 23, OŞ - 22, Turan, Muğan - 17, Standard - 12, Karvan - 9.
