Nə şiş yanacaq, nə kabab

Nizam-İntizam Komitəsinin (NİK) bu gün keçirilməli olan iclası baş tutmayıb. Bu barədə azerisport.az-a komitə rəhbəri Tofiq Fətullayev məlumat verib.

“İclas bu gün keçirilmədi. Çünki gündəlikdə duran əsas məsələ - Xəzər Lənkəran – Neftçi oyununda baş verənlərlə bağlı əlimizdə tam informasiya yoxdu. Hələ onu toplamaq və araşdırmaqla məşğuluq. Ola bilər ki, sabah, ya da o birisi gün toplaşaq və qərar verək” – deyə müxbirimizlə söhbətində Fətullayev bildirib.

Düzü, bu qərar bir qədər təəccüblü və gülməli görünür. Ortada baş vermiş hadisə, Lənkəran stadionda asayişin pozulması və təhlükəsizliyin tam qorunmaması faktı var. Bundan əlavə, XL-in baş məşqçisi Ağasəlim Mircavadovun da cəzalanması məsələsi gündəmdə idi. Amma NİK gözləmə mövqeyi tutdu və bu faktın özü hər şeyin qanun çərçivəsində həll olunmayacağını göstərir.

Aydındır ki, Xəzər Lənkəran çempionluğa əsas namizədlərdən sayılır və baş məşqçi ilə stadionun diskvalifikasiyası ona çox böyük zərbə endirər. Üstəlik, klub rəhbərliyi də, belə demək mümkünsə, hadisələri qabaqlayaraq, özü AFFA və PFL-ə şikayət edib. Amma əgər NİK məhz bunu – yəni XL tərəfinin şikayətlərini əsas götürürsə, vəziyyəti qarışdırır: bu komitə adından da göründüyü kimi, yalnız nizam-intizam məsələlərinə baxır. Əgər kimsə hakimlikdən və ya ona qarşı qeyri-obyektiv münasibətdən narazıdırsa, buna baxmaq üçün xüsusi Ekspert Komissiyası çağırmaq olar. Yaxud hakimin özünü elə Hakimlər Komitəsi cəzalandıra bilər.

İndiki halda, yalnız bir şey dəqiq görünür: AFFA hər üç tərəfin (XL, PFL və Hakimlər Komitəsi) uduşda qalması üçün hər şeyi edəcək. Təəssüflər olsun ki, bu özü də futbolun inkişafını dayandıran amillərdəndir. Hər şey ədalət və qanun çərçivəsində həll olunmalıdır, kabinetlərdə, “sən öl, mən ölüm”lə yox.

Amma məgər birinci dəfədirmi?