Zaur Məmmədov: İndi yəqin bizdən əl çəkərlər
Simurqun prezidenti Zaur Məmmədov Tuyqun Nadirova cavab verib. Azerisport.az xəbər verir ki, funksioner Xəzər Lənkəranın vitse-prezidenti Simurq – XL oyununda baş hakim Əfqan Həmzəyevin Zaqatala klubuna yardım etməsi ilə bağlı fikirlərini kəskin etirazla qarşılayıb.
“Nadirovun bəyanatı barədə eşitmişəm. Deyir ki, Əfqan Həmzəyev XL-lə oyunda Simurqa kömək edib. Maraqalıdır, o bizə necə kömək edib? Birincisi, həmin oyunda 1:2 hesabı ilə məğlun olmuşuq. Üstəlik, Həmzəyev Malıginin son dəqiqələrdə vurduğu təmiz qolunu da saymayıb. Halbuki, yan hakimi qolu sayıb mərkəzə qaçmışdı. Əgər o, Nadirovun dediyi kimi bizim hakimizin olsaydı, Simurq həmin görüşü heç-heçə başa vurardı və “altılığ”a düşərdi.
Amma biz hakimdən şikayət etmədik. Hesab etdik ki, bu yalnız adi səhvdir. Simurq haqqında çox danışırdılar. İndi yəqin bizdən əl çəkərlər” – deyə Məmmədov bildirib.
Simurqun prezidenti Həmzəyevin zəif cəhətlərinə də aydınlıq gətirib: “Mən hesab edirəm ki, Həmzəyevin hakim kimi qətiyyəti çatmır. Əgər o, Avropada oyunları idarə etsəydi, tam başqa cür olardı. Hesaba alınmayan ikinci qol epizodunda hakim Xəzərin futbolçusuna ikinci sarı – qırmızı vərəqə göstərə bilərdi. Sonra isə Neftçinin xeyrinə penalti təyin edə bilərdi”.
Məmmədov Lənkəran azarkeşlərinin hərəkətinə haqq qazandıranları başa düşmür: “Azarkeşlərin hərəkətlərinə gəlincə, gərək onları heç kəs müdafiə etməsin. “Nou Kamp” və ya “Santyaqo Bernabeu” stadionlarına 90 min adam gəlir. Onlar belə hərəkət etsəydilər, onları heç kəs müdafiə etməzdi. Məsələn, Afrika kuboku zamanı azarkeşlərdən biri meydançaya qaçdı. Amma polislər vaxtında hərəkət edərək, onu zərərsizləşdirdilər. Sonra bu epizodu uzun müddət televiziya ilə göstərdilər. Yaxşı ki, bizim Avropaya böyük çıxışımız yoxdur. Yoxsa lənkəranlı fanatların hərəkətlərini bütün dünya görərdi”.
