Neftçinin dostları əcnəbi hakim istəyir
“Neftçi-Xəzər Lənkəran matçında baş verənlər Azərbaycan futbolu adına növbəti bir biabırçılıqdır”. Azerisport.az xəbər verir ki, bu sözləri “Neftçinin Dostları” Sülh və Mətbuat Klubunun rəhbəri Mətləb Salahov deyib.
Qurum rəhbəri bu hadisələrin “böyük” futboldan danışmağın hələ tez olduğunu göstərdiyini qeyd edib. Salahovun fikirlərini olduğu kimi nəzərinizə çatdırırıq:
“Biz bütün baş verənlərin tam sakitləşməsindən və AFFA-nın qərarının açıqlanmasından sonra fikirlərimizi açıqlayırıq. Təəssüf, ki ölkə çempionatının yayım hüququna malik olan televiziyanın öz öhdəliklərini yerinə yetirməməsi ucbatından ölkənin futbol ictimaiyyəti bu derbi oyununu izləyə bilmədi və belə rüsvayçılıq yarandı. Baş verənlər ilk növbədə ölkəmizdə futbol adına danışmağın hələ çox tez olduğunu göstərdi. Biz Xəzər-Lənkəran azərkeşlərindən də incimişik. Hamı gözəl xatırlayır ki, fevralda keçirilən Neftçi - XL oyununda lənkəranlı azərkeşlərə qarşı hücum edilməsini və baş verən qarşıdurmanı ilk dəfə məhz biz pisləmişdik. Biz düzlüyün və həqiqətin tərəfindəyik. Amma son oyunda Lənkəranda yaşananlar lənkəranlı azərkeşlərə heç yaraşmadı. Neçə illərdir gözəl və baxımlı futbola çevrilən Neftçi- Xəzər-Lənkəran oyunları indi şillə-təpik meydanına dönüb. Futbola zövq almaq, gözəl oyun izləmək üçün baxmalıyıq.
Dünya gözəl futboldan zövq alır, biz isə gör nə gündəyik?! Biz həm Neftçinin, həm də Xəzər-Lənkəranın Çempionlar Liqasında və Avropa Liqasında möhtəşəm oyunlarını Lənkəranda və Bakıda izləmək əvəzinə, çimərlik hakimləri ucbatından meyanlarda kəllə atırıq.
Fakt budur və bu hərəkətlərimizlə bütün dünyanı da özümüzəgüldürürük. Bizdə futbol ona görə sevilməyəcək ki, Realın, Barselonanın, Çelsinin oyunlarını canlı ekrana gətirən bir kanal futbolumuzun derbisini yayımlamır. Özümüz öz futbolumuzu gözdən salırıqsa, kim bizə hörmət edəcək? Biz AFFA prezidentindən xahiş edirik ki, apreldə Neftçi və Xəzər-Lənkəran arasında keçiriləcək derbi oyununa əcnəbi hakimlər çağırılsın. Çünki başqa bir çarə yoxdur. Ölkədə “dişə dəyəsi”bir hakim yoxdursa nə etməliyik? Ona görə də UEFA bizim hakimlərimizi ən yaxşı halda çimərlik oyunlarına təyin edir”.
