Daha bir final və iki Mourinyo üz-üzə

Bu gün Bakı vaxtı ilə saat 23:45 UEFA Çempionlar Liqasının 1/4 final mərhələsinin daha iki oyunu start götürür.

 

Azerisport.az xəbər verir ki, cütlərin arasında ən çox maraq doğuranı liqanın 2005/06-cı illər mövsümünün finalında üz-üzə gələn Arsenalla Barselonanın duelidir. “Sen Deni”dəki finaldan fərqli olaraq, bu dəfə bizi iki matçlıq mücadilə gözləyir və Arsen Vengerin xidmətlərinə kölgə altına salmadan, bu dəfə də Barselona cütün favoroti hesab olunur. Qarşılaşmanın daha bir maraq doğuran məqamı futbolçu kimi Arsenalda yetişən Tyerri Anrinin artıq Barselonanın heyətində sabiq komandasına qarşı meydançaya çıxması və “Emireyts”ə qayıtmasıdır.

 

Digər cütdə İnter və ÇSKA görüşür. Əsla yanılmayın və tələsməyin! “Neradzuri” ilk baxışdan aşkar favorit təsiri bağışlasa da, gənc Leonid Slutski və onun istedadlı komandasını hesabdan silməyin. Sevilya ilə cütdə də ispanlar daha şanslı görünürdülər, nəticədə isə ”hərbçilər” uzun intizardan sonra Rusiyaya Çempionlar Liqasının 1/4 finalını bəxş etdilər. Maraqlıdır ki, ÇSKA-nın hazırki baş məşqçisini iş tərzinə və gənc yaşında uğurlar qazandığına görə Rusiyada … “Bizim Mourinyo” adlandırırlar. Joze Mourinyo özü isə, bildiyiniz kimi, İnteri çalışdırır. İki Mourinyo üz-üzə. Bu özünəməxsus dueldən kim qalib çıxacaq?

 

 

UEFA Çempionlar Liqası

1/4 final, ilk oyunlar

31 mart (saatlar Bakı vaxtı ilə)

 

23:45. Arsenal – Barselona

23:45. ÇSKA – İnter