Türklər Qəbələnin heyətində George Hacını tapdılar

Türkiyədə "I Beynəlxalq Kuşadası Turniri"ndə çıxış edən Qəbələnin U-13 komandası ikinci görüşündən də uğurlu nəticə ilə ayrıldı.

Azerisport.az xəbər verir ki, Ankaragücü ilə bərabərə qaldıqdan sonra penaltilərdə üstün olan komanda üçün ikinci matç da çox önəmli idi. Klubun rəsmi saytı görüşün gedişini belə dəyərləndirib: “Fiziki göstəricilərinə görə bizimkilərdən xeyli üstün olan Manisa Turqutluspor ilk görüşündə Ankaragücünü üstələməyi bacarmışdı (1:0). Odur ki, oyunun heç də asan olmayacağı öncədən bəlli idi. Matçın startında bir neçə epizod yaxaladıq. Xüsusilə, tamaşaçıların əfsanəvi Georgi Haciyə bənzətdikləri Hacı Hacıyevin oyunu qeyd olunmalıdır. Boyunun, çəkisinin, eyni zamanda yaşının rəqiblərindən kiçik olmasına baxmayaraq, o, texnikası ilə hər kəsi heyran qoymağı bacarırdı. Elə onun ilk ara pasından sonra Fərid Əsədli qapıçı ilə üzbəüz qaldı, lakin zərbəsi aralıdan keçdi. Az sonra daha bir epizodu əldən verdik. Lakin üstünlüyümüz qolla nəticələndi. Künc zərbəsindən ötürülən topu Fərid Məmmədov tora göndərdi. Qeyd edək ki, Fərid ötən ilə Qəbələnin formasını geyinmiş sabiq milli futbolçu Azər Məmmədovun qardaşı oğludur.”

İlk gündən sonra Qəbələ və Ankaragücünün aktivində hərəyə 4 xal var. Lakin şəxsi oyunlara görə komandamız birinci pillədəir. Qəbələ bu gün Bakı vaxtı ilə 13.15-də Midlsbro, 17.05-də Fənərbağçaya qarşı oynayacaq. Çox güman ki, 1/4 finala vəsiqə qazanmaq üçün bir qələbə yetərli olacaq. Hazırda A qrupunda vəziyyət aşağıdakı kimidir.