Martın ayının ən yaxşı futbolçusu: Araz Abdullayev

Azərbaycanda mart ayının ən yaxşı futbolçusu müəyyənləşdi. Azerisport.az xəbər verir ki, saytımızda aparılan sorğuda azarkeşlərin əksəriyyəti – 39%-i səsini Azərbaycan yığmasının və Neftçinin gənc futbolçusu Araz Abdullayevə verib.

Neftçinin vunderkindi ilk gündən liderliyi ələ alıb və bu qiyabı mübarizədə bir neçə təcrübəli həmkarını qabaqlayıb. “Yarış”ın gedişində Xəzər Lənkəranlı Emeka Opara ona müqavimət göstərməyə çalışsa da, sonda 27% səslə ikinci olub. Digər 5 futbolçu isə 6% və daha az səs toplayıb: Fərid Quliyev və Maksim Medvedev – hərəyə 6%, Robertas Poşkus – 5%, Fabio Luis Ramim – 4%, Aleksandr Şoliç – 3%, İqor Melnik – 2%. Daha 2% respondent hansısa başqa futbolçunu “ən yaxşı” hesab edib. 5% isı ümumiyyətlə, mart ayında heç kimin oyununu elə də bəyənməyib.

Fevralın ayının ən yaxşısı Juninyodan sonra, Araz Abdullayev azerisport.az-ın sorğusunun ikinci qalibi oldu. Ümid edirik ki, bu, aprelin 18-də 18 yaşı tamam olacaq Rubin və ya Everton kimi klubların potensial üzvünün ad gününə ən yaxşı hədiyyələrdən biridir.