Neftçidən sərt cavab: Heç kim bizə kömək etmir!

Neftçinin mətbuat xidməti guya son turlarda hakimlərin komandaya kömək etməsi ilə əlaqədar mətbuatda gedən yazılarla bağlı açıqlama verib.

“Son vaxtlar KİV-də belə bir fikir formalaşıb ki, guya hakimlər Neftçiyə kömək edir. Qəbələ ilə son oyun bir daha göstərdi ki, bu fikir qətiyyən düzgün deyil. Oyun zamanı baş hakimin verdiyi qərarlardan da görünür ki, bu cür söz-söhbətlər mənasızdır. Rəqib komanda hesabda öndə olarkən açıq şəkildə vaxtı uzatmağa çalışırdı. Görüşün baş hakimi isə belə epizodlarda bir dəfə də olsun əlini cibinə salmadı. Neftçinin forvardı Vladimir Voskoboynikovun “fair-play” qaydalarına əməl etmədiyi epizodda rəqib futbolçu açıq-aşkar şəkildə onu vuraraq, kobudluq etdi. Qəbələnin digər futbolçuları da Vladimirə yaxınlaşıb, ona zərbələr endirdilər. Lakin referi heç bir futbolçuya vərəqə göstərmədi” – bəyanatda belə deyilir.

Azerisport.az xəbər verir ki, mətbuat xidməti Neftçinin yüksək yerlər uğrunda mübarizəni davam etdirəcəyini də bildirib: “Bütün çətinliklərə baxmayaraq, komanda “altılığ”a vəsiqə qazana bilib. Neftçi mövsümün sonunadək yüksək yerlər uğrunda mübarizəni davam etdirəcək. Flaqman uğurlarını daim öz gücü hesabına qazanmışdır, indiyədək belə olub, bundan sonra da belə olacaq”.