Səmədovu ələ keçirmək üçün daha bir real şans

Bu gün Moskva Lokomotivinin prezidenti Nikolay Naumov yerli mətbuata əslən azərbaycanlı olan, Ukrayna vətəndaşı Aleksandr Əliyevin iştirak ərizəsinə Rusiya vətəndaşı kimi salındığını bildirib. Azerisport.az xəbər verir ki, klub rəhbəri bunu Rusiya Federasiyanının (RF) konstitusiyasında müvafiq bəndlə əlaqələndirib. “Vətəndaşlıq qanunu” maddəsinin 6-cı bəndində deyilir: “Digər vətəndaşlığı olan RF vətəndaşı RF ərazisində yalnız RF vətəndaşı kimi qəbul olunur”. Elə həmin maddənin digər bəndində isə “RF vətəndaşlığının digər vətəndaşlığı qəbul etməsi onu RF vətəndaşlığından məhrum etmir”.

Bu o deməkdir ki, hətta Əliyev bundan sonra üç və ya dörd ölkənin vətəndaşlığını qəbul edərsə, bu onun əcnəbi olması demək deyil. Çünki RF konstitusiyası ikili vətəndaşlığı tanıyır.

Həmyerlimiz Aleksandr Səmədovda da eyni vəziyyətdir. Onun atası – Vadim Səmədov Azərbaycanda doğulub, deməli onun üçün Azərbaycan Respublikasının vətəndaşlığını almaq problem deyil. Aleksandr həmçinin Rusiya vətəndaşı olduğundan, “bir güllə ilə iki dovşan vurmaq” olar. Yəni Səmədov həm Rusiyada yerli futbolçu kimi çıxış edir, həm də problemsiz Azərbaycan yığmasının şərəfini qoruyur. Hər şey bu qədər sadədir. Məsələnin AFFA-dan və onun ağıllı siyasətindən asılı olduğunu deyəndə, sözümüzü havaya atmırdıq. İşləyin, cənablar!