İnter çempionluqdan məhrum edilə bilər

İtaliyada “Kalçiopoli” qalmaqalı yenidən alovlanır. Azerisport.az xəbər verir ki, İtaliya Futbol Federasiyasının (FIGC) prezidenti Cankarlo Abete və FIGC baş prokuroru Stefano Palatsi işə yenidən baxılmağını gözləyirlər. Neapolda aparılan araşdırmaların başa çatacağı gün – aprelin 13-də federasiya rəhbərliyi məsələnin yenidən gündəmə gətirilib-gətirilməməsini müzakirə edəcək.

Yuventusun sabiq prezidenti, 4 il əvvəl dünyaya səs salmış qalmaqalın əsas iştirakçısı Luçano Moccinin vəkili bildirib ki, 2006-cı ildə Yuventusdan alınan “skudetto”nun İnterə verilməsi qeyri-qanunidir. Çünki Milan klubu da həmin mövsüm müəyyən çirkin əməllərin iştirakçısıdır.

“Yenidən telefon danışıqları yazılan kassetləri dinləyəcəyik. Çünki bu mənim federasiya rəhbəri kimi işimin pir parçasıdır” – deyə “La Gazzeta dello Sport” nəşrinə açıqlamasında Abete deyib.

Turin qəzeti olan “Tuttosport” 2006-cı ilin çempionluğunun İnterin əlindən almasının vacibliyini önə çəkib.