Foqts niyə klubların işini görür?
Bakıda 3 günlük toplanışda olan Azərbaycan yığması bu gün mətbuata açıq məşq keçirib. Azerisport.az xəbər verir ki, yaxın günlərdə milli komandanı hər hansı bir oyunun gözləmədiyini, növbəti yoldaşlıq görüşlərinin isə yalnız mayda baş tutacağını nəzərə alsaq, Berti Foqtsdan heyətdə hər hansı yenilik, taktiki sxemlərin sınaqdan çıxarılmasını gözləməyə dəyməzdi.
Yığma komanda 3 gün ərzində (sabah toplanışın son günüdür) fiziki hazırlıq üzərində işləyəcək. Bunu həm yığmanın futbolçuları, həm də Foqts özü müsahibələrində dəfələrlə qeyd edib. Almaniyalı mütəxəssis yenə futbolçuların fiziki durumundan narazıdır və belə demək mümkünsə, “pəncərədən kənar” toplanışın təşkili də məhz bununla əlaqədardır. Amma istər-istəməz insanın ağlına müəyyən suallar gəlir: 1) Əgər Foqts hər ay futbolçuları başına yığıb 3-4 günlük toplanışda onların fiziki hazırlığını inkişaf etdirəcəksə, klublar hara baxır? 2) Ümumiyyətlə, futbolçuların ayrı-ayrı komandalarda çıxış etməsinin nə mənası var?; 3) Klub məşqçilərinin fəaliyyəti bu qədərmi qənaətbəxş deyil? 4) Bəlkə yığmanı hər hansı bir komandanın bazasında toplamaq, Foqtsu da ora baş məşqçi təyin etmək məqsədəuyğun olar?
Müstəqil Azərbaycan futbolunun neçə yaşı varsa, bu sualların da o qədər çox yaxşı var. Hələ Berti Foqtsun Azərbaycanı bir futbol ölkəsi kimi tanımadığı vaxtlarda milliyə baş məşqçi təyin olunan mütəxəssislərin hamısı şikayətlənirdi: “seçmə oyunlar ərəfəsində toplanışa 3 gün vaxt verilir və biz bilmirik, bu müddətdə taktiki sxemləri sınaqdan keçirək, yoxsa oyunçuların fiziki durumunu qaydasına salaq?” Əvvəlllər bu sözlərə elə də diqqət yetirilmirdi, çünki hər kəs anlayırdı ki, klublarda futbolçuları formanın zirvəsində saxlamaq üçün münbit bşərait yoxdur. Məsələn, vitaminləşdirmə və bərpa proseslərinin təşkili 90-cı illərdə Azərbaycan klubları üçün Himalayın zirvəsi qədər əlçatmaz idi. Bəs indi? İndi ki, şərait baxımından hər şey qaydasındadır və komandaları iddiaları yerə-göyə sığmayan məşqçilər çalışdırır. Bəs niyə Foqts yenə də gileylənir?
Bu suala cavab tapmağı almaniyalı mütəxəssis özü də çox istərdi. Amma tapa bilmir. Ya da tapıb, lakin klub məşqçilərinin yenidən onun üzərinə tənqidlərlə şığıyacağından ehtiyatlanaraq, müşahidələrini dilə gətirmir. Biz ki, heç nədən çəkinmirik! Çəkinmirik və deyirik: Qarabağ, Neftçi və Bakının fiziki durumu istənilən səviyyədə deyil. Bunda baş verən məşqçi dəyişikliklərinin (Neftçi və Bakıda), o cümlədən, kadr çatışmazlığının (Qarabağ) rolu var. Nəzərə alsaq ki, millinin özəyini də elə əsasən bu klubların futbolçuları təşkil edir, Foqtsun bu vaxtsız toplanışlarının əsl məqsədi gözlərimiz önündə aydın canlanar.
Berti Foqts futbol ictimaiyyətinin sərhədsiz inamını qazanmaq üçün hələ heç nə etməyib. Qarşıdakı seçmə mərhələ bizə çox ümidlər versə də, unutmayaq ki, onun başlanmasına hələ 5 ay var. Futbol ölçüləri ilə bu elə də uzun müddət deyil. Amma o da var ki, klublar Premyer Liqanın yekun mərhələsinə qədəm qoyurlar. Və heç bir klub məşqçisi çempionatın qızğın çağında, həlledici matçlara hazırlaşdığı bir vaxtda 4-5 futbolçusunu 3 günlük də olsa, itirmək istəməz.
Deməli, qapanmış çevrə alınır: nə Foqts futbolçuların durumunun pis olmasında klubları açıq şəkildə tənqid edir (hərçənd, buna eyham vurulur), nə də klublar almaniyalı mütəxəssisin artıq onları bezdirən bu toplanışlarına etiraz edir. Hamı başını aşağı salıb öz işini görür. Hamıya yaxşıdır, hər şey yaxşıdır.
