“Qarabağla oyun mənim üçün əlamətdar oldu”

Bakının heyətində ilk qoluna imza atan Venyu klubun rəsmi saytına açıqlamasında bu hadisədən çox sevindiyini dilə gətirib. Azerisport.az xəbər verir ki, braziliyalı orta xətt oyunçusu çempionluq uğrunda mübarizə apardıqlarını bir daha vurğulayıb: "Bu gün komandamız çox əhəmiyyətli bir qələbə qazandı. Çempionluq uğrunda mübarizədə bu 3 xal bizə hava-su kimi lazım idi.

Bilirdik ki, Qarabağ öz meydanında məğlub olmur, bu səbəbdən oyuna fərqli əhval-ruhiyyə ilə hazırlaşırdıq. Bu oyun şəxsən mənim üçün də bir məqamla yadda qaldı. Mən Bakının heyətində ilk qolumu vurdum. Çalışacağam ki, bundan sonra da komandamız üçün faydalı olum.

Bu gün komandamız öz sözünü deməyi bacardı, başqa cür ola da bilməzdi, çünki biz hər oyuna çempion kimi çıxırıq, bu titulu qoruyacağımıza əminəm".