Azərbaycanlı futbolçunun vətəndaşlığına xüsusi komissiya qərar verəcək
Rusiyada Lokomotivin azərbaycanəsilli futbolçusu Aleksandr Əliyevin ətrafında mübahisələr davam edir. Azerisport.az xəbər verir ki, Ukrayna vətəndaşlığını daşıyan, lakin “dəmiryolçular”ın etirazından sonra Rusiya vətəndaşı kimi adı iştirak ərizəsinə salınan Aleksandr Əliyev barədə son qərar Rusiya Futbol Premyer Liqası (RFPL) və Rusiya Futbol İttifaqının (RFİ) yaratdığı birgə komissiya verəcək.
Məsələnin bu dərəcədə “şişməsinin” əsas səbəbi Ukraynada ikili vətəndaşlığın konstitusiya tərəfindən dəstəklənməməsi və Əliyevin Rusiya pasportu almaq üçün Ukrayna pasportundan imtina etməsinin vacibliyidir. Bu halda, futbolçu Ukrayna yığmasının şərəfini qorumaqdan da məhrum ediləcək.
Lokomotiv isə Aleksandrın Rusiya ərazisində, konkret olaraq, Xabarovskda doğulmasını əsas götürərək, futbolçunun çempionatın iştirak ərizəsinə yerli kimi salınmasına çalışır. Klub bu məqsədlə RFPL-ə onun pasportunun surətini də təqdim edib
“Odun üstünə yağı” yarımmüdafiəçinin özü töküb. Elə bu gün “Seqondya Sport” nəşrinə müsahibəsində Əliyev Rusiya pasportunun olduğunu bilmədiyini deyib: “Lokomotivdə deyirlər ki, məndə RF pasportu var? Düzü, mən heç onu görməmişəm. Əgər bu pasport mənim Ukrayna yığmasında oynamağıma mane olarsa, ondan imtina edəcəyəm”.
Ruslar məsələyə birgə komissiyanın aydınlıq gətirəcəyini deyirlər. Amma necə? RPFL və RFİ-nin yaratdığı birgə komissiya bir insanın vətəndaşlığına necə aydınlıq gətirə bilər?
Bütün bunlar rus xalqının və Rusiya hökumətinin heç ölmək bilməyən “böyük qardaşlıq” hisslərinin qalıqlarıdır. Rusiya mətbuatı postsovet məkanı ölkələrindən olan futbolçu və məşqçilərə də “bizimkilər” deyə müraciət edir. Axı Şahin Diniyevin ölkənin ən böyük və qədim mətbu orqanlarından birindən rusiyalı kimi göstərilməsini unutmamışıq...
Bütün bu mübahisələrin sonunda, Aleksandr Əliyevin yerli futbolçu hesab ediləcəyi və Ukrayna yığmasının şərəfini qorumağa davam edəcəyi təqdirdə, digər həmyerlimiz – Aleksandr Əliyevin Azərbaycan yığması perspektivləri daha real görünəcək. Çünki qanun hamı üçün qanundur. Müvafiq olaraq, istisnalar da hamı üçündür.
