Ermənilərin qorxaqlığı yenə gündəmə gəldi

Rusiyalı futbol hakimi Yuri Baskakov 2005-ci ildə “Birlik kuboku” çərçivəsində keçirilən Neftçi – Pünik oyununu (2:0) yada salıb.

“Çox çətin oyun idi. Deyə bilərəm ki, karyeramda idarə etdiyim ən çətin qarşılaşma budur. Çünki SSRİ-nin dağılmasından sonra bu Azərbaycan və Ermənistan klublarının ilk və sonuncu oyunu idi. Yadımda qalmayıb, nə qədər vərəqə göstərdim. Amma iş heç bunda da deyil. Oyun dava-dalaşsız başa çatdı. Ən böyük uğur bu idi. Düzdür, sonradan mehmanxanada komandaların məşqçiləri, inzibatçıları arasında dava düşmüşdü. Lakin bunun oyuna heç bir aidiyyəti yox idi. Davaya qarşılıqlı çətin münasibətlər səbəb olmuşdu” – azerisport.az xəbər verir ki, kulichki.ru-ya müsahibəsində Baskakov belə deyib.

Xatırladaq ki, Neftçinin Pünikə 2:0 hesabı ilə qalib gəldiyi il komandamız turnirin finalına çıxmışdı. Növbəti mövsüm - Neftçinin qalib olduğu ildə isə komandalar yarımfinalda qarşılaşmalı olsalar da, Pünik Ermənistana qaçaraq, görüşə çıxmamışdı.