Əzəli rəqibdən hədiyyə və turun iki əlamətdar hadisəsi
“Unibank” Premyer Liqası finiş xəttinə yeni liderlə girdi. Və bu lideri “zirvə”dən salmaq çox çətin olacaq.
Azerisport.az xəbər verir ki, futbol qəribəliklərlə doludur. Məsələn, Xəzər Lənkəranın Azərbaycan çempion olmasını bəlkə də ən az istəyən insanlar Neftçi azarkeşləridir. Amma vəziyyət elə gətirdi ki, məhz Neftçi bəlkə də bu gün XL-in çempionluğa yolunu açdı. “Ağ-qaralar”ın İnter üzərində qələbəsindən sonra bir gün əvvəl liderlik kürsüsünə əyləşən lənkəranlılar çətin ki, bir də bu kürsünü əldən versin. Çempionatın sonuna hələ 4 oyun olsa da, Ağasəlim Mircavadovun komandaları həmişə məhz həlledici anlarda soyuqqanlılıq göstərmələri ilə seçiliblər. Bu mənada gələn turda Lənkəranda baş tutacaq XL – İnter matçı taleyüklü olacaq. Xatırladaq: Mircavadovun diskvlafikisiyası artıq başa çatıb və o, yetirmələrini texniki zonadan idarə edə biləcək.
Bununla belə, əzəli rəqibə “hədiyyə” bir yana dursun, Neftçi bu qələbə ilə çox vacib 3 xal əldə etdi. Növbəti uğursuzluq komandanın üstündən xətt çəkilməsi ilə nəticələnə bilərdi və Cavid Hüseynov buna imkan vermədi. Məhz İnterdən transfer olunan futbolçunun gözəl qolu və bu qolun “bankirlər”i çətin vəziyyətə salması bəlkə də Kaxaber Çxadadzeni belə özündən çıxardı. Lakin oyunsonrası mətbuat konfransında əsəblərini cilovalaya bilməyən gürcüstanlı mütəxəssis unutmasın ki, İnter çempionluğu əldən buraxsa, günahkar məhz o özü olacaq. Hər halda, Çxadadze artıq bir neçə turdur komandanı izləyən uğursuzluq zolağından çıxmağın yollarını tapa bilmir.
İkinci “altılıq”da da iki əlamətdar hadisə yaşandı. Daha doğrusu, onlardan biri yaşandı, digəri yox. Birinci hadisə odur ki, OŞ Sumqayıtda Standarda qalib gəlməklə Simurqu 7-ci yerdən sıxışdırdı və mövsümün əvvəlində medallar uğrunda mübarizə aparan Zaqatala klubu bu mövsüm ilk dəfə olaraq, 8-ci pilləyə düşdü. İkinci hadisə isə Karvanın daha bir tur premyer liqanın təmiz havasını udmaq imkanı əldə etməsi ilə ələqadardır. Muğanın evdə Turana qalib gələ bilməməsi yevlaxlıların I birinci diviziona düşməsini ən azı bir turluq təxirə saldı. Deyəsən, bu təxirəsalma elə cəmi 1 turla da kifayətlənəcək.
“Unibank” Premyer Liqası, 28-ci tur
Turnir vəziyyəti
İlk "altılıq": XL – 25 xal, İnter – 24, Bakı – 23, Qarabağ, Neftçi – 19, Qəbələ - 15.
İkinci "altılıq": OŞ - 28, Simurq – 27, Turan – 24, Muğan – 21, Standard – 18, Karvan – 10.
