A Seriyası. Romanın çempionluğu artıq utopiya deyil
İnterin zirvəyə dönməsi cəmi iki gün çəkdi. Roman derbisindən qalib çıxan paytaxtın eyniadlı komandası liderliyi qaytardı. Bununla Klaudio Ranyerinin komandası çempionluq yolunda inamlı addım atdı.
Azerisport.az xəbər verir ki, “Derby D`Italia”nın ardınca “Derby di Roma”da da əvvəlcədən favorit göstərilən komanda qalib gəldi. Hərçənd, təhlükəli zonanın bir addımlığında qərarlaşan Latsio əzəli rəqibinin əsəbləri ilə oynamağa imkan tapdı. Birinci hissəni Rokkinin qolu ilə məhz “səma-mavililər” qalib kimi bitirmişdilər. Amma oyunun qəhrəmanı adını getdikcə “canavarlar”ın “uğur çubuğu”na çevrilən Çernoqoriyalı Mirko Vuçiniç qazandı. Məhz onun ikinci hissədə vurduğu iki qol (biri penaltidən) Romanı 1-ci pilləyə qaytardı.
Hesabat turunun nəticələrindən sonra Livorno B seriyasına bir qədər də yaxınlaşdı. İndi xilasedici 17-ci yer uğrunda 5 komandanın gərgin mübarizəsi gedir ki, bunların arasında nəhəng Latsio da var.
Milan Sampdoriyaya yenilməklə çempionluq şanslarını sıfıra endirdi. ÇL-ə vəsiqə verən sonuncu – 4-cü yer uğrunda formal olaraq, Yuventusun da adı qalsa da, bu gün həmin mövqeyə Samdoriya, Palermo və Napoli daha yaxın görünürlər. Xatırladaq: çempionatın başa çatmasına 4 tur qalır.
A seriyası, 34-cü tur
Turnir vəziyyəti: Roma – 71 xal, İnter – 70, Milan – 64, Sampdoriya – 57, Palermo – 55, Napoli – 52, Yuventus – 51, Cenoa – 48, Fiorentina, Parma – 46, Bari – 43, Kalyari, Kyevo – 41, Katanya – 40, Udineze – 39, Latsio – 37, Bolonya – 36, Atalanta – 34, Syena – 20, Livorno – 26.
