Rusiya. Anji 4-cü yerə qalxmaq şansını əldən buraxdı

Dünən Rusiya Premyer Liqasında 6-cı tura yekun vuruldu. Azərbaycanlı futbol azarkeşlərinin yaxından izlədiyi çempionatında mübarizə yeni-yeni qızışır, buna görə də hələ komandaların qərarlaşdığı pillələr hər hansı qəti fikir yürütmək üçün kifayət deyil.

 

Amma azerisport.az xəbər verir ki, Spartak-Nalçik yaxşı mənada təəccübləndirməkdə davam edir. Yuri Kranojanın hesabat turunda da qələbə qazandı və inamla 1-ci pillədə qərarlaşıb. Əlbəttə, komandanın sona qədər bu sürətə davam gətirəcəyi inandırıcı deyil, amma onu da qeyd etmək yerinə düşər ki, nalçiklilər 14 xalın hamısını, belə demək mümkünsə, ortabab və zəif hesab olunan kollektivlərdən alıb. Bu da çempionatın sonuna yaxın, Premyer Liqada qalmaq uğrunda mübarizədə “ağ-qırmızılar”a çox kömək olacaq.

 

Həmyerlilərimizə gəlincə, onu deyə bilərik ki, hesabat turu Rusiyada oynayan və işləyən azərbaycanlılar üçün uğurlu olmadı. Diqqət yetirin, Anji (Mahir Şükürov) məğlub oldu, Terek (Şahin Diniyev), Saturn (Emin Mahmudov), Dinamo (Aleksandr Səmədov) və Lokomotiv (Aleksandr Əliyev) isə oyunlarını heç-heçə ilə başa vurdular. Mahmud bu tur meydançaya çıxmadı, Şükürov 78, Səmədovla Əliyev isə 90 dəqiqə mübarizə apardılar. Üst-üstə 5 matç, 258 dəqiqə mübarizə, 4 heç-heçə və 1 məğlubiyyət.

 

Soydaşlarımız komandaları arasında ən yuxarıda Terek qərarlaşıb – 8-ci pillə. Lokomotiv, Anji və Dinamo yanaşıdırlar: 10, 11 və 12-ci yerlər. Ən zəif bənd isə hələ ki, Saturndur – 14-cü yer.

 

Yeri gəlmişkən, bazar ertəsi öz meydançasında Rostova məğlub olan, Anji qələbə sayəsində 4-cü 5-ci pilləyə qalxa bilərdi.

Anji – Rostov 1:2

Terek – Dinamo 1:1

Saturn – Spartak 0:0

Spartak-Nalçik – Krılya Sovetov 1:0

Tom – Zenit 0:0

ÇSKA – Lokomotiv 1:1

Amkar – Rubin 0:1

Alaniya – Sibir 2:1