"Avrokubok şanslarımız artıb"
Neftçinin baş məşqçi əvəzi Arif Əsədov Bakı ilə oyun ərəfəsində fikirlərini bölüşüb. Azerisport.az xəbər verir ki, mütəxəssis qarşıdakı görüşə nikbin yanaşır.
"Bu oyunun hazırlığına dünəndən başlamışıq. U-19-un heyətində olan hər 4 futbolçumuz artıq komandamıza qayıdıb. Bu gün onlar da hazırlıq prosesinə qoşulacaqlar, fərdi məşqlər edəcəklər. Yol yorğunluğunu da nəzərə almaq lazımdır. Konkret ad çəkmək istəmirəm, ancaq həmin futbolçulardan bir-ikisinin adı "18-lik"də olacaq. Yəqin ki, onlar Bakı ilə görüşdə forma geyinə biləcəklər.
"Çempionatda gərgin mübarizə gedir. İlk "altılıq"da hər tur sürprizlər olur, lider dəyişir. Son vaxtlar yaxşı formada olan Bakı 3 oyundur uduzmur. Hiss olunur ki, rəqib komandanın düşərgəsində əhval-ruhiyyə yaxşıdır. İnter üzərində qələbədən sonra da bizim avrokubok şanslarımız artıb, Bakı isə çempionluğa oynayır. Şansları 50-50-yə dəyərləndirirəm. Bununla belə, oyuna yalnız qələbə üçün çıxacağıq. Çalışacağıq ki, 3 xal sayəsində turnir mövqeyimizi daha da yaxşılaşdıraq" – deyə klubun rəsmi saytına müsahibəsində Əsədov bildirib.
