Çempionlar Kuboku ümidi ilə yaşayan Azərbaycan

Azərbaycan çempionu Araz futzal üzrə UEFA Çempionlar Liqasının həlledici mərhələsində mübarizəyə start verir. Azerisport.az xəbər verir ki, “Dördlər finalı”nın yarımfinalında komandamızın rəqibi İspaniya çempionu İntervyudur.

 

Siz rəqibin baş məşqçisinin öz komandasının daha güclü olduğunu deməsinə, Joze Alessio da Silvanın məhz İntevryunun favorit olduğunu söyləməsinə elə ciddi yanaşmayın. Bu ilin yanvarında Macarıstanda keçirilən AÇ-dən əvvəl də Azərbaycan yığmasına statist mövqeyi ayrılırdı. Sonunu xatırlayırsınızmı? Bəli, komandamız yarışın gedişində medalçılar sırasına düşməyə layiq olduğunu sübutə yetirsə də, 3-cü yer uğrunda həlledici qarşılaşmada Çexiyaya məğlub oldu. Amma hamı gördü ki, bu məğlubiyyət futbolçuların görüşə daha çox psixoloji cəhətdən hazır olmaması ilə əlaqədar idi. Böyük turnirlərdə adətən belə olur: finala vəsiqəni son anda, penalti zərbələri və ya bəxtsizliklə əldən verən kollektiv “bürünc” uğrunda mübarizəyə köklənə bilmir.

 

Əgər bu gün turnirin şəksiz favoriti İntervyu ilə matçda Alessio da Silva və onun yetirmələri rəqibinə sürpriz etməyi bacarsa, hansısa inanılmaz ssenari hesabına Avropanın ən güclü klubuna qalib gəlsə, şübhə etməyin ki, Araz finaldakı rəqibinin də başını çox ağrıdacaq. Və məsələ heç də cütün digərindən daha güclü olmasında deyil. İş psixoloji hazırlıqdadır.

 

Əlbəttə, Naxçıvan klubunun buralara qədər gəlib çıxması özü bir uğurdur. Bəlkə də bundan artığını Arazın qarşısına tələb kimi qoymaq düzgün çıxmazdı. Amma inanmağa ki haqqımız var! Axı bu oyunçuların – Tyaqo, Bero Jade, Maşadu, Borisov və Fərzəliyevin nəyə qədər olduğunu bilirik. Onda nədən kubok ümidləri ilə yaşamayaq?

 

Unutmayaq ki, qələbələr heç də həmişə ən güclüyə nəsib olmur. Kuboku başı üzərinə qaldırmağa çox vaxt daha inadkar olan komandalar qaldırır. Araz özü də bunu başa düşsə, onda təmsilçimizin qarşısında heç kəs dayana bilməz.