Azərbaycanlı azarkeşlər həmyerlimizi Rusiyada tək qoymadılar

Yavaş-yavaş Anjinin əsas heyətində yerini möhkəmləndirən Mahir Şükürov Rubinlə matçdan sonra azerisport.az-ın müxbiri ilə söhbətində həm bu qarşılaşma, həm də komandasının ümumi çıxışı barədə danışıb.

 

“Əvvəlcədən bilirdik ki, çətin olacaq. Əvvəla, ikiqat Rusiya çempionu ilə qarşılaşırdıq. İkincisi, Kazan stadionunun meydançası yaxşı vəziyyətdə deyildi. Belə meydançada topu saxlamaq, texniki cəhətdən nəsə göstərmək mümkün deyil. Meydançada yalnız fiziki mübarizə getdi və matçboyu komanda baş məşqçinin bütün tapşırıqlarını yerinə yetirdi. Nəticədən razıyıq. Rubin çempiondur, biz isə debütant. Səfərdə 1 xalla qayıtmaq, məncə, pis nəticə deyil.

 

İndi bizə bir qədər çətindir. Bir az qeyri-sabit çıxış edirik. Heyət tez-tez dəyişir. Bu nə ilə bağlıdır? Baş məşqçi heyəti məşqlərə görə müəyyənləşdirir. Həftə ərzində özünü ən yaxşı tərəfdən göstərmiş futbolçular əsas heyətdə yer alırlar. Hər həftə özünü göstərməlisən. Çünki heç kəsə oynamaq zəmanəti verilməyib. Hacı Hacıyev oyunçuların adına və ya soyadına diqqət yetirmir. Onun üçün oyunçunun sərgilədiyi futbol maraqlıdır” – deyə Şükürov bildirib.

 

Mahir Rubinlə oyundan sonra Kazanda azərbaycanlı azarkeşlərlə görüşdüyünü də söyləyib: “Bizi çox yaxşı qarşıladılar. Oyuna azərbaycanlı azarkeşlər də gəlmişdilər. Matçdan sonra onlarla tanış olduq, söhbətləşdik, şəkil çəkdirdik. Bu çox xoş idi”.