Rusiya. Azərbaycanlılardan üst-üstə 8 xal

Rusiya Premyer Liqasında 7-ci turun oyunları keçirildi. Bu çempionat bizim üçün yalnız orada çıxış edən həmyerlilərimizin “fəaliyyəti” prizmasından maraqlı olduğundan birbaşa nəticələrə və turun hadisələrinə keçək.

 

Azerisport.az xəbər verir ki, bu mövsüm Rusiya Premyer Liqasında daha bir azərbaycanlı debüt etdi. Bu, hələ ki, adı bizim olub özü bizim olmayan Emin Mahmudovdur. 17 yaşlı istedad Dinamo ilə görüşün 34-cü dəqiqəsində təcrübəli Andrey Karyakanı əvəzləyərək yüksək eşelonda ilk matçını keçirdi. Təəssüflər olsun ki, o da komandası Saturna kömək etmədi və Ramenskoe təmsilçisi səfərdə Dinamoya 0:1 yenildi.

 

Amma əvəzində bu nəticə Azərbaycan yığmasına daha bir potensial namizəd (nə qədər ki, Rusiya millisinin formasını geyməyib, onu belə çağıracağıq) Aleksandr Səmədovu sevindirməyə bilməzdi. Komandasının qələbə qazandığı görüşdə Səmədov start heyətində meydançaya çıxdı və 80-ci dəqiqədə əvəzləndi.

 

Yalnız “adı, yaxud soyad bizim olanlar” silsiləsindən daha bir futbolçu – Aleksandr Əliyev isə komandası Lokomotivin Tom üzərində qələbəsinə (2:1) matçda “dəmiryolçular”ın ikinci qolu vurmaqla töhfə verdi. Bununla Əliyev qollarının sayını 6-ya çatdırdı və bombardirlərin siyahısının ilk pilləsində yerini bir qədər də möhkəmləndirdi.

 

Nəhayət, həm adı, həm də özü Azərbaycanla qoşa çəkilənlər. Şahin Diniyevin çalışdığı Terek səfərdə Zenitin, Mahir Şükürovun formasını geydiyi Anji isə Rubinin ad-sanından qorxmadı. Hər iki qarşılaşma həmyerlilərimizi sevindirən qolsuz bərabərliklə sonuclandı. Mahir isə ilk dəfə Rusiya Premyer Liqasında 90 dəqiqə meydançada oldu.

 

Ümumilikdə isə Nalçik Spartakının möhtəşəm çıxışı davam edir. Bu komanda 7 görüşdə hələ ki, məğlub olmayıb və 1-ci pillədə yerini qoruyur. Mövsüm əvvəlində çempionluğa ən real namizədlərdən sayılan ÇSKA, Rubin, Zenit və Lokomotiv onun arxasında gəlirlər. Spartak (Moskva) 7-ci, Terek 8-ci, Dinamo isə 10-cu, Anji isə 11-cidir.

 

 

Premyer Liqa, 7-ci tur

 

Krılya Sovetov – Amkar 1:1

Spartak Moskva – Spartak-Nalçik 0:0

Zenit – Terek 0:0

Rubin – Anji 0:0

Rostov – Alaniya 0:1

Sibir – ÇSKA 1:4

Dinamo – Saturn 1:1

Lokomotiv – Tom 2:1