Yeddi komandanın gözünü dikdiyi yarımfinallar

18-ci Azərbaycan kuboku da sona yaxınlaşır. Bu gün bu turnirdə finala doğru ilk addımlar atılacaq.

 

İlk, yoxsa növbəti? Azerisport.az xəbər verir ki, 8 aya yaxındır davam edən bu turnirdə sona bir qədər gözlənilməz “dördlük” qalıb. Yox, əslində XL, İnter və Bakının (premyer liqanın cari tunir cədvəlinin də göstərdiyi kimi) – ölkənin bu gün üçün ən güclü 3 klubunun yarımfinala çıxması ümumilikdə gözlənilən idi. Amma 4-cü komandanın Olimpik-Şüvəlan olacağına çoxları bədbinliklə yanaşırdı. Çünki hələ oktyabrda, ölkə kubokunun 1/4 finalında OŞ-un Simurqla üz-üzə gələcəyi məlum olanda mütəxəssislər üstünlüyü Zaqatala klubuna vermişdilər. Bu, Simurqun ardıcıl 5 oyunda qələbə qazanıb mövsümün rekorduna imza atdığı vaxtlarda idi. İndi isə, bildiyiniz kimi, vəziyyət tamamilə fərqlidir...

 

İndidən XL – İnter finalını proqnozlaşdıranlara bir neçə məsləhətimiz var: birincisi, tələsməyin, kubok spesifiki turnirdir və burada mübarizənin taleyi iki oyunda həll olunduğundan hər bir gözlənilməzlik baş verə bilər. İkincisi, İnterin Bakı ilə görüşlərdə hər zaman çətinliklə üzləşdiyini yada salın. Üçüncüsü, unutmayın ki, kubok Nazim Süleymanovun komandası üçün mövsümü hər hansı bir uğurlu nəticə ilə bitirmək üçün sonuncu şansdır. Bundan əlavə, turnirin finalına vəsiqə şüvəlanlılara avtomatik olaraq, UEFA Avropa Liqasına vəsiqə verəcək. Çünki digər finalçının (ya İnter, ya da Bakı) premyer liqanın yekunlarına görə avrokuboklara çıxa biləcəyinə yəqin ki, heç kəs şübhə etmir.

 

Deməli, bu gün yeganə məqsədi Avropa Liqasına vəsiqə qazanmaq olan Qarabağ, Neftçi və Qəbələ yarımfinalda XL-ə azarkeşlik edəcək. Nə olsun, Roman Pokora da Olimpik-Şüvəlanı dəstəkləməyə söz verib...

 

Ali riyaziyyatın tərkib hissəsi olan bu hesablamanı kənara qoyub... ayrı hesablamaya keçək. Amma bunun üçün real vəziyyətə nəzər salaq. OŞ – XL cütündə lənkəranlıların şansları bir qədər artıq görünür. XL rəqibindən aşkar güclüdür, üstəlik, ilk oyunu da səfərdə keçirir. Bakı – İnter cütündə isə cüzi üstünlüyü “bankirlər”ə vermək olar. O da yalnız İnterin vəziyyəti düzəltmək üçün şansının bir qədər çox olduğunu – ikinci qarşılaşmanı evdə keçirəcəyini nəzərə almaqla.

 

 

Azərbaycan kuboku

1/4 final, ilk oyunlar

27 aprel

 

16.00. OŞ – XL

18.00. BAKI – İNTER