Mahir Şükürov: Bir sözlə, hər şey qaydasındadır

Krılya Sovetovla oyunun fasiləsində əvəzlənən Mahir Şükürov azerisport.az-ın müxbiri ilə söhbətində bunu strateji gediş adlandırıb. O bildirib ki, Hacı Hacıyev onu Spartakla 3 gün sonrakı oyuna daha yaxşı hazırlaşmaq üçün əvəzləyib: “Mənə cinahdan hücumlara qoşulmaq tapşırığı verilmişdi. Yəni həmişə elədiyim işi yerinə yetirməliydim. Fasilədə əvəzlənməyim? Düzü, Hacı Hacıyev bunu heç nə ilə izah etmədi. Əvəzləyəndə də hər hansı irad bildirmədi. Məncə, bu, strateji gedişdir. Artıq bu çərşənbə günü Moskvada Spartakla görüşməliyik. Yəqin məni həm oyuna qoruyur. Çünki Krılya Sovetovla matçın səhəri günü məşqlərə başladıq. Spartakla oyunun hazırlığı artıq başlanıb”.

Mahir həmçinin yığmanın qarşıdan gələn toplanışı barədə sualı da cavanlandırıb: “Hacıyevlə hələ yığma komanda barədə danışmamışam. Amma mənə AFFA-da dedilər ki, məsələni yoluna qoyacaqlar. Yəqin ki, Anjinin ofisinə müvafiq faks göndəriləcək. Mayın 10-dan sonra bizi dünya çempionatı ilə əlaqədar istirahətə buraxırlar. Mayın sonlarında Anjinin toplanışı var. Ola bilər ki, yığmanın toplanış kimi bu toplanış da Avstriyada keçsin. Bir sözlə, heç bir problem yoxdur”.