Yeni final, yaxud Məşqçini evə göndərən tərs zərbə
Ölkə kubokunda yeni final cütlüyü. Yarımfinalın cavab qarşılaşmasında İnteri məğlub edən Bakı iki il əvvəlki finalın təkrarlanmasına imkan vermədi.
Azerisport.az xəbər verir ki, 2008-ci ilin mayında finalda İnterlə XL qarşılaşmış və lənkəranlılar Juninyonun əlavə vaxtda vurduğu iki qolla qələbə qazanmışdılar. Bu dəfə də hər şey bu finala doğru aparırdı. Hər halda, mövsümün əvvəlində bu yana digərlərdinən daha üstün görünən iki kollektivin həm qızıl medalların, həm də kubokun sahibini müəyyənləşdirməsi təbii görünəcəkdi. Amma məsələyə Bakı qarışdı.
İlk qarşılaşmadan sonra Kaxaber Çxadadzenin yetirmələri vacib üstünlük əldə etmişdilər. Futbolda evdəki 0:1 hesablı məğlubiyyətin səfərdə artıqlaması ilə çıxılması hallarına tez-tez rast gəlinmir. Lakin ilin 5-ci ayının 5-ci günündə Bakının hücumçuları və İnterin müdafiəçiləri bu nadir hadisənin “Şəfa” stadionunun süni meydançasında yaşanması üçün əllərindən gələni etdilər. Hər üç qolda “bankirlər”in mərkəz müdafiəçilərinin kobud səhvi var idi. Cütün taleyini isə Milan Zaqoratsın avtoqolu həll etdi. Bu tərs vuruş Çxadadzeni evinə göndərən zərbə olmasın…
Lənkəranda XL öz azarkeşlərini bir qədər həyəcanlanmağa vadar etdi. İlk dəqiqələrdən oyunun ipini əlində saxlayan “ağ-yaşıllar” 78-ci dəqiqəyə qədər üstünlüklərinə şübhə yeri qoymamışdılar. Lakin ani əks-hücum, Mirko Bunyevçeviçin qüvvətli zərbəsi nəticəsində XL-in bir ayağı ilə keçdiyi finalın taleyi əlavə 30 dəqiqədə, sonra isə penalti zərbələrində həll oluna bilərdi. OŞ-un 1/4 finalda Simurqu məhz bu yolla sıradan çıxardığını nəzərə alsaq, cənublu azarkeşlərin həyəcanı əbəs deyildi. Bununla belə, XL-in Super Mariosu var. Mario Souzası. Məhz o qələbə qoluna imza atdı və Azərbaycan azarkeşinə tarixdə ilk dəfə olaraq, Bakı – XL finalını hədiyyə etdi.
Bir maraqlı məqamı nəzərinizə çatdıraq ki, indiyədək nə Bakı, nə də XL kubokun finallarında məğlub olmayıblar. “Zolaqlılar” 2005-ci ildə İnteri (2:1), cənublular isə 2007-ci ildə MKT-Arazı (1:0), 2008-ci ildə elə həmin İnteri (2:0) məğlub ediblər. Amma həyatda hər şey nə vaxtsa birinci dəfə olur…
