Qızıl oyunu keçirməyə stadion yoxdur!
Xəzər Lənkəran bu həftə tarixində ikinci Azərbaycan çempionluğunu bayram edə bilər. Bunun üçün iki faktın qovuşması lazımdır: XL-in Quzanlıdan qələbə ilə dönməsi Bakı ilə İnterin isə heç-heçə oynaması. İstənilən başqa nəticə çempionunun adının müəyyənləşdirilməsi məsələsini bir tur da təxirə salacaq.
Azerisport.az xəbər verir ki, 18 illik Azərbaycan çempionatlarının tarixində 3-cü dəfə “Qızıl oyun”a müraciət edilməsi istisna deyil. Bu gün bunun ehtimalı olduqca yüksəkdir və nəinki “qızıl oyun”, hətta “qızıl mini-turnir”in baş tutması da mümkündür. Bunun üçün XL, İnter və Bakı 32-ci turdan sonra eyni miqdarda xal yığmalıdır.
Riyazi hesablamalara və şansların dəyərləndirilməsinə keçmək fikrimiz yoxdur. Bu yazının qayəsi başqadır; “qızıl oyun”a müraciət edilməsinin müəyyənləşəcəyi halda həmin matçın keçirilməsi mümkün olan stadionlar. Yadınızdadırsa, 2001-ci ildə Neftçi ilə Şəmkir (0:1) Sumqayıtda, 2005-ci ildə isə Neftçi ilə XL (2:1) Gəncədə qarşılaşmışdılar. Çempionatın reqlamenti də “xalların bərabər olacağı halda, çempionun neytral meydançada keçirilən əlavə oyundan müəyyənləşdiyini” bildirir. Deməli, XL-in bu görüşə “vəsiqə qazanacağını” nəzərə alıb Lənkəran stadionunu və onun rəqibinin Bakı və İnterdən biri olacağını fikirdə tutub paytaxt arenalarını istisna edək. Yerdə nə qalır? Gəlin, birlikdə baxaq.
Gəncə şəhər stadionu (tamaşaçı tutumu – 25 min).
Bir dəfə “Qızıl oyun”un məsuliyyətindən çıxmış və etiraf edək ki, başıuca çıxmış stadion. 2005-ci illə müqayisədə indi bu arenanın durumu daha yaxşıdır. Tamaşaçı tutumuna görə də ölkədə ikincidir. Yeganə mənfi cəhəti həm Bakıdan, həm də Lənkərandan uzaq olmasıdır. Hərçənd, 5 il əvvəl məsafə nə Neftçi, nə də XL azarkeşlərinə mane olmamışdı.
Mehdi Hüseynzadə adına Sumqayıt şəhər stadionu (17 min)
Artıq köhnəlib və sıradan çıxıb. Bu arenaya müraciət edilməsinin yeganə səbəbi tamaşaçı tutumu amilidir. Yəni “Qızıl oyun”da anşlaqın yaşanacağına heç kəs şübhə etmir, buna görə matçı mümkün qədər daha çox tutumu olan arenada təşkil etmək gərəkdir. Amma digər başqa məqamlar Sumqayıtın əleyhinə işləyir. Şanlı tarixi olsa da, bu gün Mehdi Hüseynzadə adına stadion heç “Unibank” Premyer Liqasının tələblərinə cavab vermir. İnanmayanlar soyunub-geyinmə otaqlarına nəzər salsın.
Yevlax şəhər stadionu (8 min)
Şərait baxımından ölkənin ən yaxşı stadionlarından biridir. Amma tamaşaçı tutumunun az olması seçimdə öz rolunu oynaya bilər. Hər halda, 8 min “Qızıl oyun” üçün çox azdır.
Heydər Əliyev adına İmişli stadionu (8 min)
Yevlax barədə eyni sözləri bu arena barədə də demək olar.
Qısaca, Azərbaycanda az-çox abırlı vəziyyətdə olan stadionlara nəzər yetirdik və gördük ki, “Qızıl oyun”u bütün mənalarda ən yüksək səviyyədə təşkil etmək üçün stadionumuz yoxdur.
