Azərbaycan çempionu ÇL-in qrup mərhələsinin iştirakçısı ilə görüşə bilər
UEFA Çempionlar Liqasının ikinci təsnifat mərhələsindən mübarizəyə qoşulacaq Azərbaycan çempionunun bu mərhələdə 17 mümkün rəqibindən 10-u məlumdur. Azerisport.az xəbər verir ki, bunlar artıq daxili çempionatda birinci yeri təmin etmiş, yaxud çempion olmuş Rusenborq (Norveç), Liteks (Bolqarıstan), Dinamo Zaqreb (Xorvatiya), BATE (Belarus), Şerif (Moldova), Omoniya (Cənubi Kipr), AİK (İsveç), Bohemians (İrlandiya), Ekranas (Litva) və Aktobedir (Qazaxıstan). Bu gün üçün digər 7 namizəd isə bunlardır: Hapoel Tel-Əviv (İsrail), Sparta (Çexiya), Zaltsburq (Avstriya), Partizan (Serbiya), Jilina (Slovakiya), Visla (Polşa), Debretsen (Macarıstan).
Qeyd edək ki, Macarıstan təmsilçisi son mövsümdə ÇL-in qrup mərhələsində mübarizə aparıb.
Onu da əlavə edək ki, Xəzər və İnter çempion olacaqları təqdirdə onlar “səpələnməmiş” kollektivlər arasında yer alacaqlar və püşkatma zamanı məhz yuxarıda adları çəkilən komandalardan biri ilə üz-üzə gələcəklər. Bakı və ya Qarabağın çempionluğu halında isə ikinci təsnifat mərhələsində HİK (Finlandiya), Levadiya (Estoniya), Metallurq Liepaya (Latviya), Hafnarfyordur (İslandiya), Olimpi (Gürcüstan), Pünik (Ermənistan), Koper (Sloveniya), Renova (Makedoniya), Dinamo Tirana (Albaniya), XB Torshavn (Farer adaları), Nyu Sents (Uels), Linfild (Şimaloi İrlandiya) komandalarımıza rəqib ola bilər. Bu klubların növbəti mövsüm ÇL-də iştirak edəcəyi və “səpələnməmişlər” sırasında yer alacağı dəqiqdir. Digər mümkün rəqiblər isə Santa-Koloma (Andorra), Birkirkara (Malta), Rudar (Çernoqoriya) və Jenessdir (Lüksemburq).
