XL bu gün çempion ola, Mircavadov tarixə düşə bilər
Faşizm üzərində qələbə günü Xəzər Lənkəranın da fərdi zəfər günü ola bilər. Bunun üçün çox şey tələb olunmur: Quzanlıda 3 xal və Tofiq Bəhramov adına Respublika stadionunda heç-heçə.
Qələbə gününü qeyd edib-etməmək hər birinizin şəxsi işidir. Azərbaycanda bu gün dövlət səviyyəsində qeyd olunur və təqvimdə qırmızı rənglə göstərilib. Lakin hüquqi qanundan əlavə, hər bir insanın özünün fərdi, mənəvi qanunları var. Buna görə də Şuşanın işğalının ertəsi günü qələbə barədə danışmaq olar, ya yox, bunu özünüz fikirləşin. Bununla belə, çalışın diqqətiniz yayınmasın: bu gün növbəti Azərbaycan çempionunun adı məlum ola bilər.
Azerisport.az xəbər verir ki, günün sonunda biz çempionu elan edəcəyiksə, deməli, “XL – çempion!” deyəcəyik. Bu gün üçün digər variantlar nəzərdə tutulmayıb, çünki çempionatın başa çatmasına bir tur qalmış qızıl medalları təmin etmək üçün yalnız XL-in real şansları var. Quzanlıda Qarabağ üzərində qələbə və Respublika stadionunda İnterlə Bakının duelində alınacaq bərabərlik Ağasəlim Mircavadovu 6-cı dəfə Azərbaycan çempionu edəcək. Qocaman mütəxəssis Şəmkirdən sonra Xəzər Lənkəranı da iki dəfə çempion edərək, bu göstəriciyə görə tarixə düşəcək. Kazbek Tuayev həm Turan, həm də Neftçi ilə çempion olub. Amma indiyədək Mircavadovdan başqa heç bir mütəxəssis 4 fəqli komanda (Qarabağ, Şəmkir, Neftçi və XL) ilə qızıl medallar boynundan asmayıb. İki fərqli komandanı hərəyə iki dəfə çempion etmək isə heç bir baş məşqçiyə müyəssər olmayıb. Hələ ki...
İnter və Bakı da çempion olmaq üçün qələbə qazanmalıdır. Bu o deməkdir ki, 31-ci turdan sonra ya çempion məlum olacaq, ya qızıl medallara namizədlərin sayı 2-yə enəcək, ya da ümumiyyətlə, vəziyyət bir qədər də gərginləşəcək. Qarabağın XL üzərində qələbəsi kifayətdir ki, 32-ci turda ürəkəsdirən finiş izləyək.
Digər intriqa avrokuboklara son vəsiqəni verən 4-cü yer uğrunda olacaq. Qəbələnin şansları cüzidən də cüzidir. Amma yəqin ki, Ramiz Məmmədov XL-in məhz bu tur çempion olmasını istəyir. Çünki bu halda Qarabağda evdə 3 xal itirəcək. Neftçi üzərində ev qələbəsi isə Qəbələni 5-ci yerə qaldıracaq. O halda ağdamlılarla xal fərqi 1-ə qədər azalacaq. Son turda isə hər şey ola bilər.
Simurq, OŞ və Turana artıq heç nə lazım deyil. Muğana isə son 2 turda cəmi 2 xal lazımdır. Salyanlılar artıq bu gün planı artıqlaması ilə dolduraraq, Simurqla görüşdən 3 xal götürə bilər. Onda, əlvida, Standarda! Əks halda, Böyükağa Hacıyevin komandasının şansları qalır. Amma etiraf edək ki, çox, lap çox, olduqca... cüzi.
“Unibank” Premyer Liqası, 31-ci tur
QARABAĞ – XƏZƏR LƏNKƏRAN
BAKI – İNTER
QƏBƏLƏ – NEFTÇİ
TURAN – OLİMPİK ŞÜVƏLAN
MUĞAN – SİMURQ
STANDARD – KARVAN
Turnir vəziyyəti
İlk “altılıq”: XL – 27 xal, İnter – 25, Bakı – 24, Qarabağ – 23, Neftçi – 21, Qəbələ - 19.
İkinci “altılıq”: OŞ – 32, Simurq – 31, Turan – 25, Muğan – 24, Standard – 19, Karvan – 13.
