Yenilənmiş Qəbələ
Bu gün “Qafqaz Point” otelində Qəbələ Futbol Klubunu böyük təqdimat mərasimi keçirdi. Azerisport.az xəbər verir ki, mərasimdə Qəbələ FK yeni baş məşqçisini, icraçı direktorunu, loqotipini, veb-saytını və futbol kompleksini təqdim etdi.
Klubun prezidenti Taleh Heydərov tədbirdən əvvəl hər kəsi salamlayıb və qarşıdakı planlar barədə danışıb.
“Peşəkar klub formalaşdırmaq istəyirik. Buna qədər uşaq futbolunun inkişafına ciddi önəm verdiyimizi futbol akademiyası yaratmaq və onun başına Əli Yavaşı gətirməklə göstərdik. İndi Qəbələ FK-nı yeni səviyyəyə qaldırmaq fikrindəyik. Bunun üçün bir müddət əvvəl Evertonda çalışmış Alister Saverimuttonu kluba cəlb etmişik” – deyə klub prezidenti bildirib.
Öz növbəsində Saverimutto qarşılarında xeyli vəzifələrin durduğunu və bu vəzifələri yerinə yetirmək üçün çox işləməli olduqlarını bildirdi.
Tədbirin ən maraq doğuran hissəsi heç şübhəsiz, Toni Adamsın şəxsi ilə bağlı idi. Jurnalistlərə ilk açıqlamasında “dürüst adamlarla işləmək istəyirəm” - deyən Adams hazırki baş məşqçi Ramiz Məmmədovun komandada qalmasının mümkünlüyünü vurğuladı, transfer etmək istədiyi futbolçuların adını çəkməkdən isə imtina etdi.
“Qəbələnin uşaq komandalarından çox xoşum gəlir. Bu futbolçuların böyük perspektivi var” – deyə Adams bildirdi.
Yaxın bir il, ilyarımda Qəbələdə fantastik stadion və futbol kompleksi istifadəyə veriləcək. Bundan əlavə, klubun yeni veb-saytı və loqotipi də olacaq.
