Atletikonun 48 illik həsrəti bitdi (YENİLƏNDİ)
Bu gecə UEFA Avropa Liqasının tarixində ikinci qalib komandanın adı məlum olacaq. Azerisport.az xəbər verir ki, Almaniyanın Hamburq şəhərində yerləşən “Nordbank Arena”da Fulhem (İngiltərə) və Atletiko Madrid (İspaniya) üz-üzə gəlirlər.
2009-cu il iyulun 2-də start verilən 2009/10-cu illər mövsümü Avropa Liqasında mübarizəyə Azərbaycan təmsilçiləri – Simurq və İnter də qoşulmuşdular. Təəssüflər olsun ki, zaqatalalılar İsraiinl Bney Yehuda klubuna (evdə 0:1, səfərdə 0:3), “bankirlər” isə Slovakiya təmsilçisi Trnava Spartakına hər iki görüşdə məğlub olaraq (səfərdə 1:2, evdə 1:3), mübarizəni ilkin mərhələdəcə dayandırmışdılar.
Bugünkü finalçı Fulhem də nə qədər qəribə səslənsə də, zirvə yürüşünə ikinci seçmə mərhələdən start verib. Əvvəlcə Vetra (Litva), ardınca isə Amkara (Rusiya) iki görüşün cəminə görən qalib gələn londonlular qrup turnirinə vəsiqə qazanıb, orada isə Roma (İtaliya), Bazel (İsveçrə) və ÇSKA (Bolqarıstan) komandaları ilə mübarizədə ikinci olaraq, 1/16 finala adlayıb. Fulhem Avropanı təəccübləndirməyə məhz buradan başlayıb. Diqqət yetirin: Şaxtyor (Ukrayna) - evdə 1:1, səfərdə 2:1; Yuventus (İtaliya) - səfərdə 1:3 evdə 4:1; Volfsburq (Almaniya) - evdə 2:1, səfərdə 1:0; Hamburq (Almaniya) – səfərdə 0:0, evdə 2:1!
Komandanın baş məşqçisi Roy Hocson isə ikinci dəfə UEFA Avropa Liqasının (buna qədər UEFA Kubokunun) finalında çıxış edəcək. Buna qədər o, 1997-ci ildə İnterlə bu turnirin həlledici görüşündə iştirak etmiş və Şalkeyə yenilmişdi.
Atletikonun turnir yolu bir qədər fərqli olub. Komanda mübarizəyə Avroliqada yox, ÇL-də başlayıb. 3-cü təsnifat mərhələsində Panatinaykosdan (Yunanıstan) güclü çıxaraq, qrup turnirinə vəsiqə əldə edib. Çelsi, Porto və APOEL-lə mübarizədə cəmi 3 xal toplayan kollektiv qrup 3-cüsü kimi (yalnız əlavə göstəricilərin hesabına) Avropa Liqasının 1/16 finalına yollanıb. Burada Qalatasarayı (evdə 2:1, səfərdə 1:1), Portuqaliya Sportinqini (evdə 0:0, səfərdə 2:2), həmyerlisi Valensiyanı (evdə 0:0, səfərdə 2:2) və Liverpulu (evdə 1:0, səfərdə 2:1) sıradan çıxararaq, finalda oynamaq hüququ qazanıb. Qəribədir, amma avrokuboklarda final oynayan bir kollektiv mövsüm ərzində keçirdiyi 16 görüşdə cəmi 4 (!) dəfə qalib gəlib.
***
