Bakı ilə XL danışığa gedəcəkmi?

Artıq sabah axşam növbəti Azərbaycan çempionunun adı məlum olacaq. Azerisport.az xəbər verir ki, mayın 15-də ya XL, ya Qarabağ, ya İnter tarixində ikinci çempionluğunu qazanacaq, ya da Bakı Kəpəz, Şəmkir və Neftçidən sonra ardıcıl iki dəfə qızıl medal qazanan dördüncü kollektivə çevriləcək.

 

Amma bu yazının məqsədi titulların hesablanması deyil. Bu materialın bir mərkəz nöqtəsi var. Həmin nöqtədə cəmi bir sual dolaşır. Və bütün cavablar bu suala bir vahimə, bir şərəfsizlik, bir murdarlıq gətirir.

 

“Bakı ilə XL danışığa gedəcəkmi?”

 

Biz bu suala cavab vermək istəmirik. Çünki tarix özü cavabı bizim qarşımıza qoyacaq. Amma hər iki kluba tribuna verdik. Buyurun, oxuyun.

 

Zeynal Məmmədov, Bakının baş meneceri: “Şənbə gününü gözləyirik və çempion olacağımıza ümid edirik. Əlbəttə, başa düşürük ki, taleyimiz öz əlimizdə deyil. Amma Lənkəranda maksimal nəticə ilə dönməliyik. Mətbuatda yazırlar ki, guya Bakı bu oyunu verəcək ki, UEFA Avropa Liqasında ikinci təsnifat mərhələsindən mübarizəyə başlasın. Sizə inandıram: belə şey ola bilməz, bu, mümkünsüzdür! Oyunumuzu televiziya canlı yayımlayacaq və hamı görəcək ki, bunlar boş söhbətlərdir. Bakı idman prinsiplərini dəstəkləyir və onları pozmaq niyyətində deyil. Yalnız qələbəyə oynayacağıq”.

 

Ağasəlim Mircavadov, XL-in baş məşqçisi: “Eşitmişəm ki, Bakı ilə XL-in danışığa gedəcəyi barədə yazılar dərc olunur. Amma bundan söhbət belə gedə bilməz, çünki ortada çempionluq məsələsi var. Bunu heç şərh etmək də istəmirəm. Bu, hörməti olan klublarən fəaliyyətinə kölgə salır. Mənə yalnız ədalətli çempionluq lazımdır. Əminəm ki, Bakıya da”.

 

...Gözləyək. Saxtanı gizlətmək mümkün deyil. Saxta heç vaxt orijinal ola bilməz.