İnterin ikinci çempionluğu, XL-in ardıcıl ikinci medalsız mövsümü

“Unibank” Premyer Liqasının mükafatçıları məlum oldu. Azerisport.az xəbər verir ki, sonuncu turda Qəbələni 4:0 hesabı ilə məğlub edən İnter tarixində ikinci dəfə Azərbaycan çempionu adına layiq görüldü.

“Bankirlər”in budəfəki çempionluğunda da digər matçlarının nəticəsinin önəmi böyük oldu. Əgər iki il əvvəl Qarabağ Olimpik-Şüvəlana son turda qalib gələrək, buna qədər ikinci yerdə qərarlaşan İnteri çempion etmişdisə, bu dəfə onların xilaskarı rolunda Bakı və Neftçi çıxış etdi. “Zolaqlılar” inanılmazı gerçəkləşdirərək, Lənkəranda XL-i məğlub etdilər. Neftçinin əvəzedici heyətdən gələn gənc futbolçuları isə Qarabağa məğlub olmadı. Əks halda, çempionluğun taleyi “Qızıl oyun”da həll olunacaqdı.

İnter növbəti mövsümdə Azərbaycanı ÇL-də təmsil edəcək. Bakı, Qarabağ və XL isə UEFA Avropa Liqasında mübarizə aparacaqlar. Kimin hansı mərhələdən mübarizəyə qoşulacağı isə ölkə kubokunun finalından sonra məlum olacaq. Xatırladaq ki, həmin görüşdə yenə Bakı və XL üz-üzə gələcəklər.

İnter qızıl, Bakı gümüş, Qarabağ isə bürünc medal qazandı. Ağdamlılar XL-lə eyni miqdarda – 27 xal toplasalar da, şəxsi oyunların göstəricilərinə görə 3-cü pillədə qərarlaşdılar. XL ötən mövsümü də 4-cü pillədə bitirmişdi.