15 variant, Lənkərana dönmək ehtimalı və şərəfsiz cəmiyyət

Bu gün çempion məlum olacaq. Ya da məlum olmayacaq.

 

Azerisport.az xəbər verir ki, XVIII Azərbaycan çempionatının, yeni tərzlə desək, “Unibank” Premyer Liqasının başa çatmasına 19-20 saat qalıb. Daha doğrusu, de-fakto başa çatmasına. Bu gün hətta çempion və medalçılar məlum olacağı təqdirdə belə, Premyer Liqada mübarizəyə yekun vurulmayacaq, çünki bazaar günü hələ heç kimə lazım olmayan ikinci “altılığ”ın heç kimə lazım olmayan oyunlarını gözləmək lazım gələcək.

 

Amma ikinci variant da var ki, bu halda çempionatın başa çatacağı günü daha səbrsizliklə gözləyəcəyik. Bu, yəqin ki, mayın 30-u olacaq, ya da 3 gün əvvəl. Fərq etməz. Sözümüzün canı odur ki, hamımız bir daha Lənkərana yollanacağıq. Çempionat başa çatdıqdan sonra.

 

Niyə Lənkərana? Çünki hadisələrin müəyyən ssenari ilə cərəyan edəcəyi təqdirdə “Qızıl oyun”a müraciət edilməli olacaq. Belə görüşə bu gün yeganə yarayacaq stadion məhz Lənkərandakı arenadır. Tofiq Bəhramov adına Respublika stadionu istisna edilir. O səbəbdən ki, “Qızıl oyun”da yalnız İnterlə Qarabağ görüşə bilər və çətin ki, Ağdam klubu matçın Bakıya salınmasına razı olsun. Lap razı olsa da, ortada reqlament var və orada “neytral meydan” sözləri yazılıb.

 

Lakin Lənkərana bir daha getməyə də bilərik. Və bu halda kuboku və qızıl medalı muzeyinə 4 komandanın hər biri apara bilər. İndi turnir cədvəlində elə bir vəziyyət yaranıb ki, bu gün Lənkəranda keçiriləcək matçı izləyə-izləyə arabir digər oyunların nəticələrinə diqqət yetirməyə dəyər. Amma buna ehtiyac olmaya da bilər, çünki XL-in Bakı üzərində qələbəsi digər iki matçı formallığa çevirəcək. Ya da ki, yalnız gümüş və bürünc medalların Qarabağla İnter arasında necə bölünəcəyini müəyyənləşdirəcək.

 

İnanmayacaqsınız, amma son tur ərəfəsində cəmi 3 oyunun nəticəsindən asılı olaraq, turnir cədvəlinin ilk 3 pilləsi 15 müxtəlif hal ala bilər! Bunu necə hesabladığımızı bizdən soruşmayın, çünki sözlə izah etmək üçün hətta “ölçüsüz” olan saytımızda yer qalmaz. Sadəcə, hər 3 qarşılaşmada 3 mümkün variantın (meydan sahiblərinin qələbəsi, heç-heçə, qonaqların qələbəsi) olduğunu beyninizdə tutun. Bu halda tapmacanın açmasına bir qədər yaxınalaşacaqsınız…

 

Bu yerdə yenə XL – Bakı görüşündə nəticənin əvvəlcədən müəyyənləşdirilməsinin mümkünlüyü və hansısa şərəfsiz cəmiyyətdə bunun labüd, vacib hesab edilməsinin önə çəkilməsini xatırldıq.

 

İnanaq ki, “Unibank” Premyer Liqası belə şərəfsiz cəmiyyətlərdən olmayacaq.

 

“Unibank” Premyer Liqası, 32-ci tur

 

17.15. XƏZƏR LƏNKƏRAN – BAKI

17.15. NEFTÇİ – QARABAĞ

17.15. İNTER – QƏBƏLƏ

 

Turnir vəziyyəti

 

İlk “altılıq”: XL – 27 xal, İnter, Qarabağ – 26, Bakı – 25, Neftçi – 22, Qəbələ - 20.

 

İkinci “altılıq”: OŞ – 33, Simurq – 31, Muğan – 27, Turan – 26, Standard – 22, Karvan – 13.