İnter iki klubun 3 rekordunu təkrarladı (FOTO, VİDEO)
A Seriyasının 38-ci turunda səfərdə Syenaya 1:0 hesabı ilə qalib gələn İnter tarixində 18-ci dəfə İtaliya çempionu adını qazandı. Azerisport.az xəbər verir ki, bu görüşdə yeganə qola komandanın ən yaxşı bombardiri Dieqo Milito imza atdı.
Bu, İnterin ardıcıl 5-ci çempionluğudur. Buna qədər 1930-35-ci illərdə Yuventus, 1942-49-cu illərdə isə Torino bu cür nəticəyə imza atmışdı.
Ölkə kubokunu qazanan “neradzurri” tarixində ikinci “qızıl dubl“unu etdi. Sonuncu dəfə eyni nəticəyə İnter 2006-cı ildə imza atmışdı. Joze Mouriyonun komandası bu göstəriciyə görə də Yuventusa çatdı. “Qoca sinyora” bu mövsümədək iki dəfə “qızıl dubl” edən yeganə komanda idi.
Mövsümün yekunlarına gəlincə, ikinci olan Roma və üçüncü yeri tutan Milan ÇL-in qrup mərhələsində, Sampdoriya isə pley-off mərhələsində mübarizəyə başlayacaq. Palermo, Napoli və Yuventus UEFA Avropa Liqasına vəsiqə qazanıblar.
A Seriyasını Atalanta, Syena və Livorno tərk edib. Bu an üçün onları əvəz edəcək komandalardan yalnız Leççenin adı məlumdur. Digər iki yerə Breşia, Çezena, Sassuolo, Torino, Çittadella və Krotone namizəddir.
