Yurgen KOLER: Hər şey penalti seriyasında bəlli olacaq

Yaxın vaxtlara qədər Almaniya millisinin formasını geymiş məşhur futbolçu Yurgen Koler bu gün oynanılacaq Çempionlar liqasının finalına dair fikirləri ilə bölüşüb.

azerisport.az saytına daxil olan məlumata görə, Yurgen Koler hər iki klubu finala layiq sayır. Belə ki, bu komandalar Liqada digərlərinə nisbətən daha sabit oyun sərgiləyiblər, hər biri öz ölkəsində həm çempion, həm də kubok sahibi olaraq «qızıl dubl»a imza atıb. Və Kolerin fikrincə, bizi çox maraqlı final qarşılaşması gözləyir.

Proqnoza gəlincə, Yurgen Koler oyunun çox gərgin keçəcəyini deyir və alman komandasının penalti seriyasında qalib gələcəyinə inanır. Baxmayaraq ki, İtaliyanı da sevir və orada uzun illər boyunca top qovub.

Sözünün sonunda məşhur futbolçu ingilis Linekerin dillərdə əzbər olan kəlamını xatırladıb: «Futbol 22 nəfərin oynadığı və sonda almanların qalib gəldiyi oyundur».