Bəlkə «əzilirlər» yazaq?
Azərbaycan yığması həsrətə son qoya bilmədi. Azerisport.az xəbər verir ki, Moldova üzərində sonuncu və hələ ki, yeganə qələbə 11 il əvvələ təsadüf edir.
Bu nədir belə? Sindrom? Moldova futbolu ilə Azərbaycan futbolu arasında fərq? Futbolçuların daha təcrübəli (yaxud təcrübəsiz) olması? Əlbəttə, sıravi bir yoldaşlıq görüşünün nəticəsində tendensiya axtarmağa dəyməz. Bu heç mümkün də deyil. Bir saat əvvəl başa çatan Azərbaycan – Moldova matçının nəticəsi də heç nə demədi. Amma düşünməyə xeyli material verdi.
Bunlardan birini və bəlkə də birincisini Berti Foqts özü dilinə gətirdi: “Komandanın fiziki planda problemləri var”. Mövsümün sonu olduğu, futbolçuların fiziki, psixoloji və Allah bilir daha hansı cəhətdən yorğunluğu sözünü deyir. Amma məgər moldovanlar da bizim kimi gərgin mövsümdən çıxmayıblar? Yoxsa onların rumıniyalı baş məşqçisi oyunçularını canlandıra biləcək başqa vasitələr fikirləşib?
Məsələ ondadır ki, bu “fizika” problemi Azərbaycan yığmasını və onun baş məşqçisi Berti Foqtsu qorxulu kölgə kimi az qala iki ildir qarabaqara izləyir. Və məsələyə nə vaxt əncam çəkiləcəyi məlum deyil.
- Bəlkə "əzilirlər" yazım?
- Yox, “ölürlər” yaxşıdır – bu yerdə məşhur filmdən əfsanəvi dialoqu sitat gətirməmək olmur.
İkinci problem nə qədər təəssüflü və təəccüblü gəlsə də, qapıçı problemidir. Hər halda, bu gün üçün. Hər halda, bu oyun üçün. Kamran Ağayevin qapıçı ustalığına heç bir şübhə yoxdur və o, səviyyəsini artıq sübut edib. Amma futbol elə bir oyundur ki, burada güclü olduğunu hər gün, hər məşqdə, hər oyunda, hər epizodda sübut etməlisən. Kamranın isə məlum səbəblərdən psixoloji problemləri var. Bu yerdə Uli Ştaynın bir qapıçı məşqçisi kimi hansı səviyyəyə malik olduğu üzə çıxacaq. Lukas Podolskini “tənbəl” adlandıran Ştayn Ağayevi bu problemlərdən qurtara biləcəkmi?.. Bir də Kamrana ayaqla daha yaxşı oynamağı öyrətmək lazımdır. Biz onun Avropa klublara layiq olmasından danışırıq, amma fakt odur ki, qapıçımızın ayaqla oynamaqla bağlı ciddi problemləri var. Moldova ilə qarşılaşmada Kamran bir dəfə də olsun topu ayağı meydançaya düzgün daxil edə bilmədi. Bu keyfiyyəti yüksək səviyyədə olmayan qapıçıya heç bir Avropa klubu elçi düşməz.
Bu adi bir yoldaşlıq görüşü idi və onun nəticəsinə görə uzaqgörənliklə fikir yürütmək olmaz. Danışdıqlarımız da nisbi məsələlər idi. Amma yoldaşlıq oyunu da vacibdir, deyilmi? Və bu problemləri bu gün qabartmayasan, nə vaxt qabardasan?
Azərbaycan – Moldova 1:1
E. Məmmədov, 21 (1:0); Qodoçari 82 (1:1)
