Türkiyəni yenə Avropadan ayırdılar: AÇ-2016 Fransada
Futbol üzrə 2016-cı il Avropa çempionatının final mərhələsi Fransada keçiriləcək. Azerisport.az UEFA-nın rəsmi saytına istinadla xəbər verir ki, Avropa baş futbol qurumunun İcraiyyə Komitəsinin iclasında bu cür qərar qəbul edilib. Üç namizəd - İtaliya, Türkiyə və Fransanın arasından sonuncu qalib çıxıb. Bu barədə UEFA prezidenti Mişel Platini məlumat verib. Yaxın saatlarında Platini ilə Fransa Futbol Federasiyasının prezidenti Jan-Pyer Eskalettin birgə mətbuat konfransı olacaq.
AÇ-ni qəbul etməyə ən real namizəd sayılan Türkiyə Fransadan cəmi 1 səs az toplayıb – 6:7. Ən maraqlısı isə odur ki, həmin bu yekun səsi UEFA prezidenti, əslən fransız olan Platininin verdiyi deyilir.
Bundan əlavə, İK üzvləri 2016-cı ildə Ramazan ayının AÇ keçiriləcəyi vaxta düşəcəyini əsas gətirərək, bunun turistlərə problem yaradacağını önə çəkiblər.
Qeyd edək ki, Fransa indiyədək iki dəfə - 1960 və 84-cü illərdə AÇ, 1938 və 98-ci illərdə isə DÇ-nin final turnirlərini qəbul edib. Türkiyə isə heç vaxt böyük turnirlərə ev sahibliyi etməyib.
