Arsenal azarkeşləri Adams və Qəbələ barədə
Arsenalın azarkeş saytında klubun əfsanəvi kapitanı Toni Adams və onun yenicə baş məşqçisi təyin olunduğu Qəbələ barədə material dərc olunub. Azerisport.az həmin materialı nəzərinizə çatdırır.
Toni Azərbaycana gəlib çıxan dünya futbolunun birinci məşhur nümayəndəsi deyil. Yaxın keçmişdə Azərbaycan yığmasını Karlos Alberto Torres çalışdırıb. Berti Foqts isə indidə bu komandanın sükanı arxasındadır. Amma biri var karyerasının qürub çağlarını yaşayan və daha yaxşı təkliflər almayan məşqçinin yığmada işləməsi, biri də var kifayət qədər gənc ingilis məşqçinin öz ölkəsində ekzotik sayılan Azərbaycanın ortabab klubunun təklifini qəbul etməsi.
Belə görünür ki, cavab ortadadır: pul, pul və yenə də pul. Bu təyinat barədə oxuyan hər bir insanın ilk təəssüratları məhz belə olacaq. Mən də belə düşünürdüm. Amma məsələnin mahiyyətinə vardım və sizə bildirim ki, fikriniz belədirsə, siz səhv yoldasınız.
Çətin ki, Adamsın Qəbələyə gəlməsinin əsas səbəbi dağlarda yerləşən bu şəhərin təmiz havası ola. Bu klub 2005-ci ildə bizim üçün bir qədər qəribə səslənən “Göy-Göl” adı altında yaradılıb, 2007-ci ildə isə Qəbələyə çevrilib. Azərbaycan çempionatında həm nəticələrinə, həm də heyətinə görə möhkəm ortabab sayılır. Amma komandanın pulu var: oliqarx Taleh Heydərov nə 16 minlik yeni stadionun tikintisinə, nə də təcrübəli mütəxəssislərin dəvətinə pul xərcləməyə heyfsilənmir. Hələ ki, Azərbaycan ölçülərinə görə ulduz futbolçuların transferi barədə söhbət getmir, lakin aydındır: burada son söz Adamsın olacaq.
Bütün bunları bir kənara qoyaq. Adamsın özünə bu iş nə verəcək? O yaxşı başa düşür ki, gənc mütəxəssis üçün İngiltərə Premyer Liqasında üzdə qalmaq çox çətin, bəlkə də mümkünsüz vəzifədir. Amma ekzotik və maraqlı layihədə iştirak etmək, yeni məqsədlərə çatmaq nədən olmasın? Toni də qalib ruhu var: o, meydançada da rəqiblərinə qalib gəlib, ondan kənarda spirtli içkilərə də. Buraya da o qələbə qazanmağa gəlib; əlbəttə, bu qələbələr kiçik olacaq və bəlkə də heç nəyi həll etməyəcək. Lakin kim deyir ki, bunlara çatmaq asan olacaq? İddialı ortabab Qəbələni zirvəyə məhz Toni qaldırmalıdır.
Adams artıq əməli işə başlayıb. Fəaliyyətinin ikinci günü komandanın uşaq məktəbinə baş çəkib və orada özünün “Frenk Lempardı”nı tapıb. Tarzən Cahangirov – bu adı bir yerə yazın. Bəlkə də bir neçə il sonra Adams - Cahangirov tandemi Avropaya səs salacaq.
