Avstriya prezidenti Azərbaycan yığmasını nə vaxt qəbul edəcək?

Azərbaycan yığmasının baş məşqçisi Berti Foqts azerisport.az-ın müxbiri ilə söhbətdə Makedoniya ilə matçda bəyəndiklərindən və bəyənmədiklərindən, Avstriya prezidenti ilə mümkün görüşdən və Avropada çıxış etməyə layiq azərbaycanlı futbolçulardan danışıb.

 

“Rəqibi qələbə münasibəti ilə təbrik edirəm. Onlar bizim səhvlərimizdən istifadə edib üç qol vurdular. Buna baxmayaraq, komandamdan narazı qaldığımı deyə bilmərəm. Oyunun əvvəlində çətinliklərlə üzləşdik. Gənc futbolçular öz oyunlarını tapa bilmədilər. Makedonların da daha yaxşı formada olduğu göründü.

 

İki qolda bəxtimiz gətirmədi, üçüncü qol isə gözəl alındı. Hesabı bərabərləşdirmək imkanlarımız var idi. İstifadə edə bilmədik, beynəlxalq oyunlarda isə buna görə cəzalandırırlar”.

 

“Bir neçə eksperimentə əl atdıq. Rəşad Sadıqov dayaq yarımmüdafiəçisi kimi oynayırdı. İkinci hissədə Samir Abasovun meydançaya çıxmasından sonra oyun intizamı yarandı. Amit Quluzadənin debüt etdiyini nəzərə alsaq, oyununu bəyəndəyini deyə bilərəm. Ona yenə şans verəcəyəm”.

 

“Ən çox bəyənmədiyim amil oyuna bir qədər gec “qoşulmağımız” oldu. Təxminən 20-ci dəqiqədən etibarən meydançada mənzərə dəyişdi. 3 gündən bir oynamağı da öyrənməliyik. Çünki seçmə mərhələdə də bu cür oynayacağıq. Mərhələnin startına az qalıb, bu oyunlar bizim üçün çox vacibdir”.

 

“Havaya sifariş verə bilmərəm. Bəlkə Avstriya prezidenti ilə danışaq və o, bizə daha yaxşı hava şəraiti yaratsın?(gülür) Düzgün qeyd etdiniz: sentyabrda Almaniyaya, oktyabrda yenə Avstriyaya gedirik. Belə hava şəaritinə öyrəşmək lazımdır”.

 

“Almaniya mətbuatının nə yazdığından xəbərim yoxdur, amma heç kimə heç nə deməmişəm. Bir dənə onu bilirəm ki, Fortunanın rəhbərliyin məzuniyyətdən istifadə edərək, bizim oyunlarımıza baxmağa gəliblər. Futbolçularımdan kimisə hansısa komandaya məsləhət görsəm, bu, yalnız mənə doğma Mönxenqladbax Borrusiyası olar. Amma heç kimin adını çəkməyəcək. Yaxınlarda Avropada görəcəyimiz gənc futbolçularımız var”.