Joze Mourinyo: İtaliya futbolu mənlik deyil

Madridin «Real» klubunun baş məşqçisi Joze Mourinyo özünün yeni iş yeri, komandanın həyatını necə planlaşdıracağını və «Barselona» ilə rəqabət barədə danışıb. Məşqçi bildirib ki, onun üçün ən vacib olanı dürüstlük və intizamdır.

azerisport.az xəbər verir ki, sözügedən mətləblər barədə danışan Mourinyo deyib: «Üç ay bundan əvvəl başa düşdüm ki, İtaliya futbolu mənlik deyil. Qərara aldım ki, atmosferi dəyişim. Madrid ən yaxşı variant oldu. O ki qaldı komandada işin təşkilinə, xoşlayıram ki, futbolçular məşqlərə hardasa 1 saat tez gəlsinlər. Məşqə qədər mənimlə, komanda yoldaşları ilə ünsiyyətdə olsunlar, tibbi müayinədən keçsinlər. Oyunçuların məşqdən dərhal sonra yığışıb getmələrini də sevmirəm. Əgər gün ərzində iki məşq nəzərdə tutulubsa, istəyirəm ki, bütün futbolçular məşqlər arasındakı vaxtda komandanın bazasında qalsınlar».

«Yalana dözümüm yoxdur. Futbolçular gecikən zaman dərhal bilirəm ki, niyə belə olub. Ən yaxşısı, doğrusunu desinlər. Desinlər ki, axşamkı ziyafətdən sonra özlərini pis hiss ediblər. Amma yalandan mənə anaları ilə bütün gecəni xəstəxanada keçirmələri barədə nağıl danışmasınlar», - Mourinyo sözlərinə belə davam edib.

«Barselona»ya gəlincə, portuqaliyalı baş məşqçi bunları bildirib: «Ən güclü klublarla oynamağı sevirəm. Buna görə də, «Barsa» ilə rəqabətə ancaq sevinə bilərəm. Kataloniyalılara hansısa yarışın yarımfinalında qalib gəlmək başqa komandanı finalda udmaqdan daha zövqlüdür».