Oyuna pul qoymuş futbolçu oyunu satmaya bilərmi?

«Neftçi» futbol klubunun və milli komandanın keçmiş baş məşqçisi Vaqif Sadıqov bildirib ki, Azərbaycanda bəzi futbolçular bukmeker kontorlarında pul qoyuluşları edirlər.

 

ATV telekanalına müsahibəsində məşqçinin dediyinə görə, bunu gizlətmək mümkün deyil. Amma V.Sadıxov sözlərinə onu əlavə edib ki, pul qoyuluşu edən futbolçuların oyunları satması real deyil, onlar bu yolla yalnız əlavə qazanc əldə etmək istəyirlər.

 

Söz yox, futbolçular pul qoyuluşlarını gizlətmək üçün xeyli dəridən-qabıqdan çıxmalıdırlar. Birincisi, onları kontor işçiləri yaxşı tanıyır. İkincisi, başqa bir adam vasitəsilə pul qoyuluşu etmək istəyi də gizli qalmaya bilər, çünki «divarın da qulağı var».

 

Son illər ərzində futbolçuların bukmeker kontorlarında pul qoyuluşları etməsi ilə bağlı xarici ölkələrdə bir neçə dəfə qalmaqallar yaşanıb. İtaliyada, Almaniyada… Hər dəfə də futbolçular belə bəhanə gətiriblər ki, onlar öz oyunlarına deyil, başqa klubların oyunlarına «stavka» edirlər. Bəlkə də bu belədir. Amma buna kim zəmanət verə bilər? Və kim zəmanət verə bilər ki, tutaq ki, öz komandasının məğlubiyyətinə pul qoymuş futbolçu həmin oyunda «kefsiz» oynamayacaq?

 

Fikrimcə, bir sıra xarici ölkələrdəki kimi Azərbaycanda da futbolçuların və ələlxüsus da hakimlərin futbol oyunlarına pul qoyuluşları qadağan edilməli və belə hallar ciddi cəzalandırılmalıdır. Xatırladaq ki, bukmeker kontorları tezliklə leqallaşacaq və yarıgizli fəaliyyətdən tam aşkar fəaliyyətə keçəcəklər. Müvafiq qanunvericilik aktlarına sözügedən bəndlərin əlavə olunması heç də pis olmazdı.

 

HBİ