Vinfried Şafer: Bakının baza şəraiti Almaniyada yalnız Bavariya-da var

Vinfried Şafer bu gün «Bakı» Futbol Klubunun baş məşqçisi təyin olundu. Azerisport.az xəbər verir ki, аlmaniyalı mütəxəssis iki illik müqaviləyə imza atdıqdan dərhal sonra ilk açıqlamasını klubun saytına verdi: «Mənim üçün əsas klubun hədəfləridir. Klubun prezidenti Hafiz Məmmədovla görüşüb, ətraflı söhbət etdik. O mənə bildirdi ki, əsas məqsədi “Bakı” klubunun Avropada uğur qazanmasıdır. Mən də Hafiz bəylə razılaşdım».

 

Vinfried Şafer ölkəmiz və klubumuz haqda təəssüratlarını belə bölüşdü: «Burada gördüklərim çox xoşuma gəldi. Tam səmimi deyirəm ki, “Bakı”nın bazasını görəndə şoka düşdüm. Azərbaycanda bu cür şəraitlə qarşılaşacağımı gözləmirdim. Almaniyada belə şəraitə, təlim-məşq bazasına yalnız “Bavariya” malikdir. Digər klubların şəraiti isə “Bakı”dan aşağıdır. Həqiqən də komandanın super şəraiti var. Bura gələn futbolçular da hara gəldiklərini bilməlidirlər. Çünki “Bakı” klubu hər sahədə peşəkardır. Klubun rəhbərliyi peşəkar insanlardan qurulub».

 

Sonda almaniyalı mütəxəssis komandasının hazırlığı barədə danışdı: «Hazırdaişə dördəllə sarılmalıyıq. Çünki vaxtımız çox azdır. Ayın 15-i komanda Bakıda hazırlığa başlayacaq. Çox ciddi şəkildə çalışmalıyıq. İyulun 15-də Avroliqada ilk oyunumuza çıxacağıq. Avropada uğur qazanmaq heç də asan olmayacaq. Amma biz işimizə ciddi yanaşıb, istəyimizə çatacağıq. Biz Avropada uğur qazanmalıyıq».